News

OVP ug PLGU DavNor padayong nidalit og ayudang food packs

Details

Published: Wednesday, 13 March 2024 13:30

Written by DavNor PICKMO (Maria Lorna P. Tripoli)

Views: 162

Sa nagpadayong relief operation sa probinsya, hiniusang gidalit sa Probinsyal nga Panggamhanan sa Davao del Norte ug Office of the Vice President (OVP) ang pag-apod-apod sa mga Family Food Packs. Niadtong Marso 5, 8,210 FFPs ang gitunol sa mga apektadong barangay sa Braulio E. Dujali. Samtang, pagka-Marso 6 hangtud Marso 8, 16,286 FFPs ang suma total nga nahatag sa Siyudad sa Panabo.

Sa usa sa mga relief operations nga naubanan ni Gobernador Edwin “Kuya Gov” Jubahib, kanunay niyang ginapasabot sa katawhan ang kabahin sa mga hinungdan ug mga lakang nga himoon sa iyang administrasyon aron masulbad ang pagbaha sa probinsya.

Nangayo’g dispensa daan ang gobernador sa mga lumolupyo sa ubang baryo sa Panabo nga maapektohan sa canalization program nga lima (5) ka metros ang gilapdon ug tulo (3) ka metros ang kalawmon diin butangan og mga bag-ong culvert.

Matud ni Kuya Gov, sa panahon sa ting-ulan ang probinsya sa Davao del Norte nahimong "catch basin" sa mga silingang probinsya sama sa Davao de Oro, Agusan ug Bukidnon. Han-ok ang tubig ulan dinhing dapita, luyo sa nagapadayong proyekto ni Gov. Jubahib alang sa pagpugong sa mas grabeng epekto sa baha.

"Medyo naa nay pagkadelikado ang situation sa Davao del Norte kay naapil na ta sa LPA o Low Pressure Area. First time ni nga nahitabo sa atong probinsya, sa almost one month nga pag-ulan. So, bisan unsa ang atong project for desiltation, canalization programs, mega dike programs, dili kayahon ang volume sa tubig tungod kay ang tubig nga niabot sa Panabo o entire Davao del Norte gikan sa Bukidnon, gikpan sa Agusan, Butuan, Davao de Oro. Ang tubig gikan sa ilaha plus atong tubig diri naipon kada adlaw, buntag ug gabie… So, naa diri paingon bagsak sa Davao del Norte kay kita ang catch basin province," sulti sa gobernador.

Ang pagpanghatag sa mga ayudang pagkaon nagapadayon pa hangtod karon. Samtang, mapasalamaton ang gobernador sa walay hunong nga hinabang gikan sa OVP.