2024 National Women’s Month, miarangkada sa DavNor!
- Details
- Published: Wednesday, 06 March 2024 17:08
- Written by DavNor PICKMO (Nestor H. Mata, Jr.)
- Views: 235
Pormal nga giabrihan ang pagsaulog sa Probinsya sa 2024 National Women’s Month ubos sa temang, “Lipunang Patas sa Bagong Pilipinas: Kakayahan ng Kababaihan, Patutunayan”, nga gipahigayon sa Davao Provincial Rehabilitation Center (DPRC), Government Center, Mankilam, Tagum City, Marso 1, 2024.
Gipangunahan ni Provincial Administrator Engr. Josie Jean R. Rabanoz, CE, MPA, En.P. ang maong kasaulogan kauban ang pipila ka mga department head sa kapitolyo nga gilangkuban nila ni Provincial Assessor Engr. Lily M. Salazar, CE, MPA, REA, Provincial Budget Officer Emelia C. Palero, CPA, MSLRG, Provincial Treasurer Evelyn G. Espra, MPA, ug Provincial Warden Marilyn Erolon.
Sa mensahe ni Governor Edwin “Kuya Gov” Jubahib pinaagi ni Engr. Rabanoz, gikanayong ang pagsaulog sa women’s month dili lamang alang sa mga kababaihan apan alang sa tanan. Dili magmalampuson ang mga kababaihan kung wala ang suporta sa mga kalalakihan. Gihataga’g gibug-aton ni Rabanoz ang kamahinungdanon sa patas nga pagtratar tali sa mga kababaihan ug kalalakihan sa bisan unsang natad sa katilingban.
“So, karon nag-celebrate ta sa opening sa atoang women’s month. Dili pasabot nga kung moingon ta’g women’s month para lang gyud na sa kababaihan. Tanan na. Gi-emphasize lang gyud nga women’s month para tagaan og honor ang mga kababaihan. Pero ang mga kababaihan, dili pud na mosaler, dili pud maging successful kung wala ang kalalakihan. Sama sa giingon, nga kanang gender and development, dili pasabot nga mas molabaw ang babae o dili molabaw sa tanang mga buhat but rather equality ang atoang gina-aspire for this gender and development,” sulti ni Engr. Rabanoz.
Nagpaabot sa iyang pasalamat kang Kuya Gov si Provincial Warden Erolon gumikan sa makanunayong suporta sa gobernador sa maong pasilidad, nga dako’g natabang alang sa kausaban ug kabag-ohan sa kinabuhi sa mga binilanggo. Kalakip sab sa iyang gipasalamatan ang katukoran ug ang pag-blessing sa duha ka bag-ong gambalay sa DPRC nga mao ang Admin Building ug Mess Hall nga ilang gihandom sulod sa dugay’ng panahon nga nahataga’g katumanan sa panahon ni Kuya Gov.
“Sukad 1967, pagbuak wa gyud ta nahimoan og building. Palakpakan nato si Governor Edwin I. Jubahib, kay sa iyang paglingkod naa na ta’y bag-ong building. Dili na ta maglimas-limas sa atong building,” sumala ni Erolon.
Nipasundayag sa ilang mga tinagoang talento ang mga PDL o Person Deprived of Liberty sama sa pagkanta ug pagsayaw nga nakapahugyaw ug naghatag kalingawan sa mga bisita.
Ang kasaulogan sa 2024 National Women’s Month pinasubay sa Republic Act No. 6949 series of 1990, nga nagdeklara sa Marso 8 kada tuig isip National Women’s Day, nga nagtumong sa paghatag pasidungog sa mga kababaihan, pagmugna’g mga programang magpromotar sa gender equality ug pagmantala sa talagsaong papel sa mga kababaihan sa katilingban.
Writer: Nestor Mata, Jr.
