News

Kulang nga insentibo, gitunol na sa mga BHW ug BPATS

Details

Published: Tuesday, 05 March 2024 15:21

Written by DavNor PICKMO (Maria Lorna P. Tripoli)

Views: 207

Gidawat sa mga Barangay Health Workers (BHW) ang kulang nga salapi aron makompleto ang kinatibuk-ang insentibo nga ila nang nasugda’g pay-out niadtong bulan sa Disyembre 2023 ug ang honorarya nga P2,000 alang sa mga Barangay Peacekeepers Action Teams (BPATS). Gitunol kini sa Probinsyal nga Panggamhanan sa Davao del Norte pinaagi sa Provincial Treasurer's Office (PTO), sa Barangay Sawata Gym, lungsod sa San Isidro, Marso 1, 2024.

Ang mga nasampit nga mga barangay frontliners naggikan sa mga baryo sama sa Pinamuno, Sabangan, Dakudao, Liboton, San Miguel, Sawata, Sto. Niño, Datu Balong, Igangon, Kipalili, ug Linao, sakop sa maong lungsod.

Ang pagkalangay sa maong salapi gumikan sa gikinahanglang rekisitos sama sa ordinansa sa probinsya aron mapagula ang maong pondo.

"Ang atong mga barangay tanod karon maga-expect sila og P2,000 honorarya sa usa ka tuig ug ang atong BHW, P1,000 isip differential na na siya. So, medyo naa tay delay sa paghatag tungod ginahulat pa nato ang requirements," matud ni Assistant Provincial Treasurer Belinda C. Abalunan.

Kahibaloan nga ang mga BHW adunay insentibo nga P5,000 ug P2,000 alang sa BPATS nga madawat sa matag tuig gikan sa probinsya.

Sumala sa tigpamaba sa mayor sa maong lungsod, ang Lokal nga Panggamhanan sa San Isidro midugang og usa ka sakong bugas nga bahinon sa 20 ka mga tanod matag barangay. Dugang gibutyag nga gihatag na sa munisipyo ang mga bugas sa BPATS alang sa bulan sa Enero, Pebrero ug Marso. Aduna usab insentibong P2,500 matag tuig ang mga BHW gikan sa nasampit nga LGU, ubos sa liderato ni Mayor Silvano "Papa Banot" Gaje.

Gipahayag ni Arnel Montero, ang representante ni Governor Edwin "Kuya Gov" Jubahib nga dako ang pagpasalamat sa gobernador sa kontribusyon sa mga BHW ug BPATS diha sa tagsa-tagsa nila ka mga baryo aron sa pag-atiman sa panglawas sa mga baryohanon ug pagkab-ot sa pagka-insurgency free sa probinsya. Nipasabot usab si Montero sa rason alang ngadto sa wala makadawat sa honorarya.

"Ang atong incentives gikan sa province naa siya’y gipaluyohan nga ordinansa ug ang ordinansa nag-ingon ang makadawat lang sa incentives sa atong probinsya kadto lang mga functionaries nga nag-serve specific usa ka tuig. Pasabot ang kadtong mga functionaries nato nga nag-serve bag-o lang last year, nag-serve gikan June to December, naay nag-serve September to December, mga igsuon ko, mangayo mi’g dispensa nga kadto sila dili maapil sa pagpanghatag og incentives," pagpasabot ni Montero.