DavNor nitunol ayuda sa dul-an 10 mil ka pamilya sa Kapalong
- Details
- Published: Wednesday, 28 February 2024 17:03
- Written by DavNor PICKMO (Nestor H. Mata, Jr.)
- Views: 130
Dul-an 10 mil ka pamilyang biktima sa baha sa lungsod sa Kapalong, Davao del Norte ang natunolan og relief goods ni Governor Edwin “Kuya Gov” Jubahib, ang KAAGAPAY sa Kalamidad sa DavNor, niadtong Pebrero 26, 2024.
Gilangkoban kini sa mga Brgy. Sua-on (1,035 packs), Mabantao (96 packs), Florida (260 packs), Gabuyan (1120 packs), Tiburcia (27 packs), Capungagan (310 packs), Semong (960 packs), Katipunan (668 packs), Mamacao (1,060 packs), Sampao (2,510 packs), Luna (1,232 packs), ug Pag-asa (510 packs).
Sa mensahe ni Kuya Gov pinaagi sa iyang Executive Assistant Arnel Montero, nga gusto sa gobernador nga mahatagan gayud ang tanang katawhan sa Davao del Norte sa maong ayuda gumikan kay halos tanan apektado man sa nakalabayng pagbaha. Dugang niya nga gihandom ug nanghinaut si Kuya Gov nga ang tanang apektado sa baha mahatagan sab sa Emergency Cash Transfer (ECT) nga gikan sa Department of Social Welfare and Development (DSWD).
“Si Kuya Gov wala nasuko sa pagpanghatag og ayuda apan nasuko siya sa pamaagi nga dili maayo ug patas nga pagpanghatag. Nalipay si Kuya Gov nga ang atong probinsya nakadawat og P565 milyon alang sa mga nabahaan. Ang matag usa ka pamilya modawat og tag-P 9,960. Ang P9,960 mao na siya’y giingon sa DSWD nga Emergency Cash Transfer (ECT). Pangandoy ni Kuya Gov nga ang mga katawhan dinhi sa Brgy. Tiburcia ug Gabuyan, naay makadawat og P9,960 kada pamilya. Gusto lang nakong ipasabot ha, nga kaning P9,960 nagsugod na ang ubang LGU og dawat ug unta diri sa Kapalong makadawat mo ana,” sulti ni EA Montero.
Giklaro ni Vice Mayor Edgardo Timbol nga makasulod ang tanang ayuda nga gikan sa bisan asang tinubdan sa iyang lungsod sukwahi sa mikuyanap nga balita nga ilaha kunong gibabagan ang pagsulod sa mga ayuda sama sa Assistance to Individuals in Crisis Situation (AICS) ug uban pa.
“Dili mobabag ang atoang mayor bagkus maningkamot pa mahatagan ang tanan og ayuda. Ang atong mayor kung pwede nga lang, kitang tanan sa atong munsipyo, mahatagan og ayuda sama na lang aning gihatag sa atong mahal nga governor. Kaya nga mga igsoon ang atong munisipyo naningkamot mangayo sa ubang ahensiya sa gobyerno para tanang mga katawhan sa atong lungsod mahatagan og ayuda para ang tanan happy,” ingon ni VM Timbol.
Mapasalamatong gidawat sa mga residente sa maong lungsod ang ayudang gitunol ngadto kanila nga gilangkoban sa lima ka kilong bugas ug mga delata. Ang mga nidawat sa maong ayuda, biktima sa milabayng pagbaha nga nasitian sa probinsya sa bulan sa Pebrero ning tuiga.
Writer: Nestor Mata, Jr.
