Kuya Gov, OVP naghatag hinabang sa 4,000 ka pamilyang tribo
- Details
- Published: Wednesday, 14 February 2024 08:47
- Written by DavNor PICKMO (Noel P. Baguio)
- Views: 159
Kapin 4,000 ka pamilya sa tribo sa Gupitan, Kapalong, Davao del Norte ang nakadawat og hinabang karong adlawa gikan sa Office of the Vice President (OVP) ug sa Probinsyal nga Panggamhanan.
Gipangunahan ni Governor Edwin “Kuya” Gov ug Ymard Eje, ang Chief sa Disaster Operations Center sa OVP, ang pagpanghatag sa mga family food packs sa mga tribo, nga naapektuhan pud sa sunod-sunod nga pag-ulan nga dala sa shearline ug trough of low pressure area.
Simultaneous ang gihimong pagpanghatag sa mga ayuda sa clustered sitios didto sa Sitio Patel, Sitio Langan, Centro Gupitan, Sitio Kapatagan ug Sitio Dugayan.
Kahinumduman nga unom ang patay sa landslide sa duha ka mga sitio sa barangay, samtang apektado ang mga tribo sa pagdahili sa yuta sa mga kadalanan sa pipila ka mga lagyong sitio.
Una nang mihatag og hinabang ang OVP sa liboan ka mga biktima sa kalamidad sa Tagum City, sugod pa niadtong unang pagbaha nga epekto sa shearline.
Nakadayeg si Eje sa dakong pagtagad ni Kuya Gov sa mga apektadong residente kay matud niya dali-dali dayon nga mitawag ug nangayo ug tabang ang gobernador sa opisina sa bise presidente para sa mga biktima.
“Pasalamat ta kay Kuya Gov kay nangayo dayon siya og tabang sa OVP mao na nga ania mi karon dinhi,” sulti niya sa mga tribo sa Sitio Kapatagan, samtang iyang gipaniguro ang makanunayong tabang sa opisina ni VP Inday Sara alang sa mga nanginahanglan.
Nanawagan sab ang gobernador sa tabang sa mga tribo sa iyang gipakusog nga kampanya batok illegal logging ug sa pagpananum sa fruit trees, aron mapugngan ang pagbaha ug pagdahili sa yuta, dungan usab sa ilang sa pagbantay aron dili na makabalik sa barangay ang mga rebeldeng NPA.
Dugang niya pasalig ang pagkamatinud-anon sa iyang administrasyon sa pagpanghatag og nag-unang serbisyo ug mga hinabang, sama sa edukasyon, panlawas, panginabuhian ug uban pa aron mahaw-as ang mga tribo sa kalisud.
Writer: Noel Baguio
