News

Sen. Bato gidayeg gugma ni Kuya Gov alang kabus, dinaug-daug

Details

Published: Monday, 12 February 2024 08:36

Written by DavNor PICKMO (Noel P. Baguio)

Views: 264

Nakadayeg si Senador Ronald “Bato” Dela Rosa sa kasing-kasing ni Governor Edwin “Kuya Gov” Jubahib alang sa mga kabus ug dinaug-daug, diin nakita kini diha sa iyang pagsang-at sa reklamo sa Ayuda Scam sa Senado.

Gibutyag sa senador nga sa tanang mga gobernador sa tibuok Pilipinas, si Kuya Gov lang ang miduol kaniya aron paimbestigahan ang ayuda scam sa Senado, nga gitawag niyang grabeng pagpangdaug-daug sa mga pobre.

“Naa man na sa record sa Senado, nga siya lang ang gobernador nga niduol para ipaglaban ang karapatan sa mga recipient sa maong ayuda nga gibawasan. Tungod kay kabalo ta nga gikan siya sa pobre. Kabalo siya’g unsay kibati sa mga pobre nga naisahan. Gipapirma, gipadawat ug pagkahuman gibawi. Dili man na maayo,” sulti ni Senador Bato sa media.

Gibisita sa senador ang Davao del Norte karong adlawa, Pebrero 11, 2024, aron mohatag og relief goods sa 9,459 ka mga pamilya gikan sa Pagsabangan, Tagum City, ug sa mga barangay sa Magatos, Cambanogoy ug Buclad sa lungsod sa Asuncion.

Kahinumduman nga niadtong Enero 23, 2024, gipahigayon sa Senate Committee on Public Order and Dangerous Drugs, ubos sa mando ni Senador Bato, ang hearing sa ayuda scam, diin pila ka mga testigo ang mibutyag sa pagkaltas sa gihatag nga hinabang gikan sa Assistance to Individuals in Crisis Situation (AICS), educational assistance, ayuda sa Kasalang Bayan ug uban pang hinabang gikan sa Department of Social Welfare and Development (DSWD) ug Department of Labor and Employment (DOLE).

Sulti sa mga testigo nga niadtong Octobre 2023, ang ilang ayuda gikan sa AICS nga P5,000, gibawi ang P4,000 aron P1,000 na lang ang ilang nadala pauli ug ang P10,000 nga educational assistance gikuhaan og P9,000 aron P1,000 na lang intawon ang mabitbit sa mga estudyante.

Duna sab 500 ka pares nga gikasal sa Tagum City Hall, diin gikuhaan sab og P7,000 aron nga P3,000 na lang ang madala pauli sa mga bag-ong kinasal.

Mapasalamaton si Senador Bato sa gobernador kay kung wala mireklamo si Kuya Gov dili mahibaw-an nga ang maong ayuda scam dili lang diay nagapahitabo sa Davao del Norte, kundi sa uban pang mga probinsiya sa nasud.

“Grabe ang pagdaug-daug sa mga pobre. Kana nga kuwarta dapat para na sa mga pobre... Unya, bawion lang nimo ang kuatro mil ug usa ka libo lang ibalik. Nisamot pagka-crisis situation tong nakadawat,” sulti niya.

Nagatoo ang senador nga dunay mga dagkong politiko ang nagpaluyo niini nga scam ug nipasalig siya nga paningkamutan jud sa iyang komitiba aron matagaan og hustisya ang mga biktima.

“Paningkamutan nato. Mao gani nag-imbestiga ta para ma-determine kung kinsa kadtong nagbawas aron faylan og kaso, para mauli niya tong kwarta nga dapat nahatag sa mga recipients,” sulti sa senador.