News

70K board feet tablon, troso sikop sa Gupitan

Sa gipakusog nga kampanya ni Governor Edwin “Kuya Gov” Jubahib batok illegal logging, gisikop sa mga awtoridad ang kapin 70,000 ka board feet nga tablon ug troso sa Sitio Pipisan, Gupitan, Kapalong, Davao del Norte karong adlawa.

Luyo sa makusog nga bundak sa ulan, gikasa sa hiniusang puwersa sa Provincial Environment and Natural Resources Office (PENRO-LGU), Department of Environment and Natural Resources (DENR), ug mga elemento sa National Bureau of Investigation (NBI), Davao del Norte Police Provincial Office (DNPPO) ug sa 60th Infantry Battalion ang pag-raid sa ilegal nga mga tablon ug troso sa lawaan ug uban pang premium nga klase sa kahoy.

Gilatas sa mga enforcers ang pipila ka mga pagbaha ug pagdahili sa yuta maabot lang ang maong lugar, mga 120 kilometro ang gilay-on gikan sa Tagum City, aron dakpon ang mga illegal loggers apan wala nay naabtan ang mga awtoridad.

Rason nga gikumpiska na lang nila ang 10,000 board feet ka mga tablon ug gikarga sa tulo ka mga trak sa probinsiyal nga panggamhanan aron i-impound sa Kapitolyo, samtang ginahimo ang imbestigasyon.

Nabilin pa ang kapin 60,000 BDFT ka mga troso nga nahimutang sa ubos nga bahin sa sitio, sanglit wala kini madala sa mga awtoridad gumikan kay dili na maagian ang duha ka mga sapa padulong sa nahimutangan niini tungod sa paspas nga pagsaka sa tubig.

Gipakusog ni Kuya Gov ang kampanya sa probinsiya batok illegal logging aron malikayan ang grabeng pagbaha ug mga landslide, nga sama sa nasinati sa probinsiya sa milabay nga bulan.

Kini samtang nagsugod na pud kaylap ang pagbaha sa daghang parte sa probinsiya karong tungura tungud sa pila na ka adlaw nga pag-ulan nga dala sa low pressure area sa tibuok Mindanao karong semanaha.

 

 

 

DavNor News