News

Kuya Gov, nanguna sa paghatod og tabanag sa mga biktima sa baha

Details

Published: Monday, 05 February 2024 09:06

Written by DavNor PICKMO (Hannah Zafra)

Views: 149

Gisuroy ni Governor Edwin “Kuya Gov” Jubahib ang mga lugar nga labihang naapektohan sa sunod-sunod nga adlaw sa pag-ulan sa Davao del Norte niadtong Biyernes sa gabii, Pebrero 2, 2024. Kauban ang Quick Response Team, iyang gipangunahan ang pagtunol og unlimited supply sa arroz caldo, loaf bread, tubig, ug juice nga panulak sa mga bakwit ug mga nanga-stranded sa mga dalan sa Carmen, Santo Tomas, Kapalong, Asuncion, ug Tagum City.

Sa iyang pagsubay sa mga gibahang dalan sa munisipyo sa Carmen partikularmente sa Miranda Bridge ug Tuganay Bridge, personal nga gihatagan ni Kuya Gov og panugon ang mga kapulisan ug kasundalohan nga maoy nagdumala sa sitwasyon sa maong mga lugara. Dali-dali pud niya nga gidala ang usa ka senior citizen nga na-stranded sa Tuganay Bridge sa Davao del Norte Hospital - Carmen Zone tungod kay naglisod kini og ginhawa. Gipahibalo niya sa mga residente nga pwede sila muadto sa maong hospital kung naa sila’y gipangbati alang sa libre nga konsultasyon ug tambal.

Pahimangno ni Kuya Gov sa mga bakwit, mamahimong magpabilin lang usa sila sa mga evacuation centers hangtod wala pa nihunong ang bunok sa ulan ug pagtaas sa tubig baha. Gi-awhag usab niya ang mga residente nga nagpabilin sa ilang mga panimalay nga musakay na sa mga sakyanan nga gipang-gamit sa government agencies aron mahatod sila sa mga evacuation centers.

“𝘗𝘢𝘥𝘢𝘺𝘰𝘯 𝘵𝘢 𝘴𝘢 𝘱𝘢𝘨-𝘢𝘮𝘱𝘰 𝘯𝘨𝘢 𝘮𝘢𝘩𝘪𝘮𝘰𝘯𝘨 𝘭𝘶𝘸𝘢𝘴 𝘢𝘯𝘨 𝘵𝘢𝘯𝘢𝘯. 𝘒𝘪𝘯𝘢𝘩𝘢𝘯𝘨𝘭𝘢𝘯 𝘯𝘨𝘢 𝘮𝘢𝘨𝘱𝘢𝘣𝘪𝘭𝘪𝘯 𝘴𝘢 𝘦𝘷𝘢𝘤𝘶𝘢𝘵𝘪𝘰𝘯 𝘤𝘦𝘯𝘵𝘦𝘳. 𝘞𝘢𝘭𝘢 𝘴𝘢’𝘺 𝘮𝘢𝘮𝘢𝘭𝘪𝘬 𝘴𝘢 𝘪𝘭𝘢𝘯𝘨 𝘵𝘢𝘨𝘴𝘢-𝘵𝘢𝘨𝘴𝘢 𝘬𝘢 𝘱𝘢𝘯𝘪𝘮𝘢𝘭𝘢𝘺 𝘩𝘢𝘯𝘵𝘰𝘥 𝘥𝘪𝘭𝘪 𝘨𝘺𝘶𝘥 𝘯𝘢𝘵𝘰 𝘮𝘢𝘴𝘪𝘨𝘶𝘳𝘢𝘥𝘰 𝘯𝘨𝘢 𝘴𝘢𝘧𝘦 𝘯𝘢 𝘢𝘯𝘨 𝘢𝘵𝘰𝘯𝘨 𝘴𝘪𝘵𝘶𝘢𝘵𝘪𝘰𝘯… 𝘶𝘨 𝘬𝘢𝘵𝘰𝘯𝘨 𝘶𝘣𝘢𝘯, 𝘯𝘨𝘢 𝘸𝘩𝘪𝘭𝘦 𝘯𝘢𝘨𝘢𝘵𝘢𝘢𝘴 𝘢𝘯𝘨 𝘵𝘶𝘣𝘪𝘨, 𝘬𝘢𝘳𝘰𝘯 𝘱𝘢 𝘥𝘢𝘢𝘯, 𝘮𝘶𝘢𝘥𝘵𝘰 𝘯𝘢 𝘴𝘢 𝘮𝘨𝘢 𝘦𝘷𝘢𝘤𝘶𝘢𝘵𝘪𝘰𝘯 𝘤𝘦𝘯𝘵𝘦𝘳, 𝘴𝘢𝘬𝘢𝘺 𝘯𝘢 𝘴𝘢 𝘢𝘵𝘰𝘯𝘨 𝘮𝘨𝘢 𝘴𝘢𝘬𝘺𝘢𝘯𝘢𝘯 𝘱𝘢𝘳𝘢 𝘮𝘢𝘥𝘢𝘭𝘢 𝘮𝘰 𝘴𝘢 [𝘦𝘷𝘢𝘤𝘶𝘢𝘵𝘪𝘰𝘯 𝘤𝘦𝘯𝘵𝘦𝘳]. 𝘒𝘢𝘺 𝘯𝘢𝘢 𝘯𝘢 𝘵𝘢𝘺 𝘮𝘨𝘢 𝘱𝘳𝘰𝘣𝘭𝘦𝘮𝘢 𝘬𝘢𝘳𝘰𝘯 𝘯𝘨𝘢 𝘯𝘢𝘢𝘺 𝘮𝘢𝘨𝘱𝘢-𝘳𝘦𝘴𝘤𝘶𝘦 𝘱𝘦𝘳𝘰 𝘯𝘢𝘨𝘭𝘪𝘴𝘰𝘥 𝘯𝘢 𝘰𝘨 𝘴𝘶𝘭𝘰𝘥 𝘢𝘯𝘨 𝘢𝘵𝘰𝘯𝘨 𝘮𝘨𝘢 𝘳𝘦𝘴𝘤𝘶𝘦 𝘵𝘦𝘢𝘮. 𝘉𝘶𝘴𝘢, 𝘱𝘢𝘳𝘢 𝘮𝘢𝘭𝘪𝘬𝘢𝘺𝘰𝘯 𝘯𝘢𝘵𝘰 𝘯𝘪𝘯𝘨 𝘪𝘯𝘨-𝘢𝘯𝘪 𝘯𝘨𝘢 𝘱𝘳𝘰𝘣𝘭𝘦𝘮𝘢, 𝘬𝘢𝘳𝘰𝘯 𝘱𝘢 𝘭𝘢𝘯𝘨, 𝘣𝘰𝘭𝘶𝘯𝘵𝘢𝘳𝘺𝘰 𝘯𝘢𝘮𝘰 𝘯𝘨𝘢 𝘮𝘶𝘴𝘢𝘬𝘢𝘺 𝘴𝘢 𝘢𝘵𝘰𝘯𝘨 𝘴𝘢 𝘮𝘨𝘢 𝘴𝘢𝘬𝘺𝘢𝘯𝘢𝘯 𝘴𝘢 𝘢𝘵𝘰𝘯𝘨 𝘬𝘢𝘴𝘶𝘯𝘥𝘢𝘭𝘰𝘩𝘢𝘯, 𝘬𝘢𝘱𝘶𝘭𝘪𝘴𝘢𝘯, 𝘶𝘨 𝘴𝘢 𝘢𝘵𝘰𝘯𝘨 𝘮𝘨𝘢 𝘴𝘢𝘬𝘺𝘢𝘯𝘢𝘯 𝘥𝘪𝘳𝘪 𝘴𝘢 𝘱𝘳𝘰𝘣𝘪𝘯𝘴𝘺𝘢 - 𝘮𝘨𝘢 𝘳𝘦𝘴𝘤𝘶𝘦 𝘵𝘳𝘶𝘤𝘬𝘴 𝘱𝘢𝘳𝘢 𝘮𝘢𝘥𝘢𝘭𝘢 𝘮𝘰 𝘴𝘢 𝘦𝘷𝘢𝘤𝘶𝘢𝘵𝘪𝘰𝘯 𝘤𝘦𝘯𝘵𝘦𝘳”, sulti ni Kuya Gov.

Kauban ni Kuya Gov sa pagpangtunol og painit sa tiyan sa mga bakwit sa Carmen, Santo Tomas, Kapalong, ug Asuncion si Board Member Nickel Suaybaguio Jr. ug Provincial Administrator Engr. Josie Jean Rabanoz. Samtang, iyang gi-destino si Tagum City Vice Mayor Allan Rellon inubanan ni Executive Assistant Atty. Lingling Estabillo sa pagdala og pagkaon sa mga bakwit sa Tagum City.

Balikan ni Kuya Gov og bisita ang kanhing mga lugar aron mahatdan ang mga residente og mga kinahanglanong supplies, ayuda, ug pagkaon sa mga sumusunod nga adlaw. Padayon gihapon ang iyang pagsuroy ug pagtunol og tabang kauban ang DavNor Quick Response Team sa uban pang mga parte sa probinsya nga apektado sa baha.