News

Pinakadaghang bakwit sa probinsya, gihatdan pagkaon ug tubig

Subay sa mando ni Gobernador Edwin Jubahib sa padayong paghatud sa mga hinanaling hinabang sa mga apektado sa baha, gihatdan sa Provincial Social Welfare and Development Office sa pagkigtambayong sa Provincial Disaster Risk Reduction and Management Center, ug ubang buhatan ang mga bakwit sa Brgy. Mesaoy, New Corella, niadtong Miyerkules sa gabie, Enero 17.

Dul-an 1,400 ka mga indibidwal ang natunolan og hot meals alang sa ilang panihapon. Sa pinakaulahing taho sa LGU New Corella, alas-dose sa hapon, Enero 18, ang Barangay Mesaoy maoy pinakadaghang naigo sa baha ug namakwit nga dunay natalang 523 nga bakwit. Misunod ang Sto. Niño – 58 bakwit, Poblacion – 50 bakwit, Macgum – 39 bakwit, Del Pilar – 21 bakwit, New Sambog – 13 bakwit, Sta. Cruz – 12 bakwit, ug Suawon – 3 bakwit. Sa pinakauwahing datus usab sa DavNor PDRRMC, ang New Corella ang dunay pinakadaghang bakwit sa tanang lungsod ug siyudad sa tibuok probinsya.

Nagdeklara na og State of Calamity ang LGU New Corella pinaagi sa Resolution No. 2024-01 Series of 2024 sayo nianang adlawa aron nga mahatagan og gahum ang local chief executive nga magamit ang quick response fund nga 5% sa LDRRM Fund alang sa CY 2024 sa pagresponde sa mga apektado sa grabeng pagbaha resulta sa Shear Line.

 

 

 

DavNor News