News

PLGU DavNor, padayon ang tabang sa mga bakwit

Details

Published: Thursday, 18 January 2024 10:30

Written by DavNor PICKMO (Mervin Jay Z. Suaybaguio, PhD, DDM)

Views: 201

146 indibidwal o 46 pamilya nga gikan sa Barangay Mankilam ug Barangay Pagsabangan sa Tagum City ang gihatagan og kasamtangang kapasilongan sa New DavNor Gym sa kapitolyo human nalunod sa baha ang ilang mga panimalay gumikan sa sunod-sunod nga pag-ulan nga nasinati sa Davao del Norte sugod niadtong Lunes (Enero 15) sa gabii.

Subay sa mando ni Governor Edwin “Kuya Gov” Jubahib, kinsa personal nga nisuta sa kahimtang sa tanang apektadong lugar sa probinsya, dali-dali dayon nga gipalihok ang Provincial Camp Coordination and Camp Management (CCCM) Response Cluster sa panguna sa Provincial Social Welfare and Development Office (PSWDO) aron mahatagan og hinanaling tabang ug pagtagad ang katawhan.

Sugod alas 8:30 sa buntag, Enero 18, nagpahitabo dayon og libreng medical check-up ang Provincial Health Office (PHO) aron masiguro nga luwas ang mga bakwit sa posibleng makuha nga sakit tungod sa baha ug dili maayo nga panahon. Gawas sa check-up, adunay libreng tambal nga gidalit ang PHO sama sa cough/cold medicine, antipyretic medicine, pain relivers, gastric medicine, vitamins (ascorbic acid ug multivitamins), nebulizer alang sa mga asthmatic nga pasyente, jerry cans aron masiguro nga luwas ang ilimnon nga tubig, ug uban pa.

Gilauman sa Probinsyal nga Panggamhanan nga madugangan pa ang mga bakwit kay hangtod karon padayon gihapon ang pag-ulan sa Davao del Norte. Samtang, walay hunong ang pagmonitor sa Provincial Disaster Risk Reduction and Management Office (PDRRMO) sa dagan sa panahon ug kahimtang sa tanang lugar ilabi na ang mga katubigan ug kabukirang bahin sa probinsya.