DavNor Magical Christmas Village giablihan na
- Details
- Published: Friday, 24 November 2023 09:26
- Written by DavNor PICKMO
- Views: 373
Gidugok sa liboan ka mga Dabaonon ang grand opening and lighting sa DavNor Magical Christmas Village karong gabii, Nobyembre 23, 2023 sa Magsanoc-Aala Park atubangan sa Kapitolyo sa Davao del Norte.
Mismo si Governor Edwin “Kuya Gob” Jubahib, nga nagsul-ob sa sinina sa hari, ang nanguna sa pagpasiga ug pag-abli sa maong Christmas Village, diin duna kini’y tema nga Disney Enchanted Christmas.
Kauban ni Kuya Gov si 1st District Congressman Pantaleon Alvarez ug ubang mga opisyales, mga department heads nga gipangunahan ni Provincial Administrator Engr. Josie Jean Rabanoz, mga empleyado sa Kapitolyo ug lakip na ang mga personal nga bisita sa gobernador.
Sulti sa gobernador nga angay lamang pasalamatan ug iselebrar sa katawhan ang Pasko bisan pa luyo sa mga pagsulay sa kinabuhi.
“Mapasalamaton kita sa atong Labaw’ng Makagagahum nga bisan man pa sa kalisdanan… padayon nga ania ta karon atong gi-enjoy ang gift of life… Mao ni ang time nga atong ipadayag ang atong kalipay ug kalampusan sa atong pamilya ug sa atong kinabuhi… Dili lang kwarta ang hinungdan para malipay ang usa ka tawo… kung dili ang gitawag nato nga spirit of Christmas, nga anaa kita sa maayong panlawas… padayon ta nga baskog ug nilampos sa atong mga tagsa-tagsa ka mga pagpaningkamot,” ingon niya.
Dugang ni Kuya Gov nga ang naghatag kaniya sa kabaskog, maayong panghunahuna ug kalig-on sa pagserbisyo mao ang katawhan mismo sa Davao del Norte.
Mihatag sab ug dagkong premyo si Kuya Gov sa mga midaog sa Best Fantasy Dress, samtang nalingaw ang tanan sa libreng tinapay ug ice cream nga dalit sa gobernador.
