News

Kuya Gov, niboto!

Wala ray singko minutos niboto si Governor Edwin "Kuya Gov" Jubahib sa iyang presinto sa Southern Davao Elementary School, Panabo City atol sa Barangay and Sangguniang Kabataan Election 2023, Oktubre 30, 2023.

Gikalipay ni Kuya Gov ang nasinatiang kahapsay ug kalinaw samtang siya niboto sa iyang mga napiling kandidato sa iyang presinto. Matud pa niya nga iyaha gyung naboto ang kandidato nga iyang gusto.

“So, dako ang akoang pasalamat sa atoang barangay leader nga nahimong hapsay ug sa atoang mga teacher, sa COMELEC, nga hapsay ang atoang voting center dinhi sa Barangay Southern Davao. So, at least naboto nako ang kandidato nga akong gusto nga mahimong punong barangay ug barangay councilor dinhi sa atong barangay sa Southern Davao nga mao ang akong barangay,” sumala ni Gov Jubahib.

Gisaysay sa gobernador ang mga natahong election violence nga nahitabo sa siyudad sa Tagum ug sa Lungsod sa San Isidro. Siya nagkanayong kanunay ang iyang gihimong koordinasyon sa mga kapulisan ug kasundalohan aron pagmintinar sa kahapsay ug kalinaw sa tibuok probinsya.

“So far, adunay daghang reported nga mga election violence nga nahitabo especially sa District I, sa Tagum City, and sa Municipality of San Isidro, Sawata. So, the rest wala pa may lain nga mga reported violence nga gikan sa atong PNP o sa COMELEC except sa Tagum City ug sa San Isidro, Sawata. Isip amahan sa atong probinsya wala ‘ta nagkulang sa deployment sa atong mga kapulisan. Nakig-coordinate ko sa atoang Provincial Director Police Col. Alexander Serrano, sa 10thInfantry Division, sa ilahang presence sa kasundalohan nga motabang sa pagbantay sa tanang precinct sa tibuok probinsya sa Davao del Norte especially na sa 1001stBrigade nga gipangulohan ni B/Gen. Ronnie Babac and sa 1003rdBrigade nga gipangulohan ni B/Gen. Marion Ancao ug sa tanang mga battalion nga under sa duha ka brigade ug usa ka division nga nihatag gyud og full support sa atong kapulisan sa pagresponde nga malikayan nga adunay mga mahitabong kagubot sa tanang voting precinct sa tibuok probinsya sa Davao del Norte,” pagsaysay sa gobernador.

Nanawagan si Kuya Gov sa tanang midagan sa maong piniliay nga likayan ang paghimo og binuang o pagpanikas labi na panahon sa inihapay. Nanghinaot kini nga mamahimong generally peaceful ang maong bugnong lugaynon.

Writer: Nestor Mata, Jr.

 

 

 

DavNor News