News

Sundalo nanawagan dili kahadlokan ang Martial Law

WALAY ANGAY KAHADLOKAN SA MARTIAL LAW!

Kini ang pasalig sa mga opisyales sa kasundalohan atol sa gihimong emergency 2nd Quarter Provincial Peace and Order Council meeting Martes, Mayo 30, 2017.

“At the outset, we would like to inform everyone that the Martial Law of the past based in 1935 Constitution is not similar to the Martial Law that we have declared today. . . There’s nothing to fear, we have different constitution. . What happened in Marawi City prompted President Duterte to declare Martial Law in the entire island of Mindanao,” matod ni Capt Rey Vergel Annogui, Information Officer sa 1001st Brigade.

Dugang sa Information Officer nga sa pagdeklarar sa Martial Law, milihok lang si Presidente Duterte subay sa 1987 nga Konstitusyon aron ipasig-uli ug ipreserbar ang balaod ug kahapsay luyo sa gihimong rebelyon sa Abu Sayaff (ASG)/Maute-ISIS nga grupo didto sa Marawi City. Gawas pa ang maong deklarasyon wala magsuspinde o magpahunong sa paglihok sa balaod sa Pilipinas bisan sa mga korte. Wala usab kuhaa niini ang sibil ug politikanhong katungod sa katawhan ug nga kini adunay limitasyon nga 60 ka adlaw.

Ang Armed Forces of the Philippines (AFP) mao ang tigpatuman sa Martial Law sulod sa maong gidugayon uban sa kapolisan (PNP). Samtang nailawom sa deklarasyon, gipasabot ni Capt. Annogui ang dili angay’ng buhaton sa mga kasundalohan sama sa:

1- Dili pagdakop kung walay “warrant of arrest” gawas sa mga kahimtang nga gihisgotan sa Section 5, Rule 113 sa Rules of Court (nasakpan sa akto, gigukod, miikyas nga pinireso);

2- Nga walay dinakpan, gidetener nga tawo ang kasohan human sa tulo (3) ka adlaw;

3- Nga human molabay ang 3 ka adlaw, ang dinakpan, gidetener nga tawo kinahanglang buhian;

4- Nga dili pwedeng dakpon kung walay nahimong kalapasan sa tawhanong katungod sumala sa Konstitusyon; ug,

5- Ang deklarasyon sa Martial Law wala maghikaw sa katungod sa dinakpan nga maka-piyansa.

Hinuon aron malikayan ang wala kinahanglana nga mga pagdakop, nagpahimangno ang AFP ngadto sa mga sibilyan nga bantayan ang pipila ka hinungdanong pahinumdom apil sa:

1- Kung pwede dili una magbiyahe sa ubang dapit sa Mindanao gawas kung dunay dinalian nga kinahanglan tagdon;

2- Dili magbiyahe nga naggrupo samtang nag-motorsiklo;

3- Ang tanang rally ug dagkong grupo nga kalihokan kinahanglang dunay pagtugot sa lokal nga gobyerno.

Kung mobiyahe gyod unya naa sa checkpoint, nagpasidaan ang AFP nga:

1- Maneguro nga dunay bag-ong rehistro sa sakyanan ug driver’s license ug ubang ID nga giisyu sa gobyerno;

2- Kung dunay armas, paneguroon nga duna’y balido nga lisensya (License to own and possess firearm (LTOPF).

3- Makig-kooperar sa mga personahe sa AFP ug PNP nga naghimo ug checkpoints. Panahon sa pag-check, palonga ang headlights ug pasigaa ang suga sa sulod sa sakyanan atol sa inspeksyon. Tugoti ang paghimo sa inspeksyon;

4- Hibaloi ang tanang sulod sa imong bag. Ayaw pagdawat ug bagahe gikan sa dili nimo kaila.

Espesipiko nga gipahimangnoan sa kasundalohan ang mga menor-de-edad nga dili gayod maggawas-gawas ilabina panahon sa gabii sanglit ang mga local nga gobyerno magpatuman ang curfew.

Lakip usab nga giawhag ang mga eskwelahan ug mga establisamento nga maghimo ug emergency plan alang sa klaro nga aksyon pananglit motungha ang emerhensya.s

Giawhag sab ang publiko nga i-report dayon sa ilang hotline numbers pananglit adunay kadudahan nga mga tawo o grupo sa mga tawo. 1001 Brigade: 0917-709-0195; 1003 Brigade: 0917-623-1474; 71IB: 0956-413-5687; 60IB: 0915-301-6885 ug 161IB:   0917-338-7038.


 

More Davnor Updates at

DavNor Karon

 

DavNor News