News

Pag-instalar pag-usab sa mga ARBs sa Tagum nalangan

Misugot si Agrarian Reform Secretary Rafael Mariano nga i-postpone ang pag-instalar pag-usab sa 159 ka mga Agrarian Reform Beneficiaries (ARBs) nga sakop sa Madaum Agrarian Reform Beneficiaries Association Inc. (MARBAI) sa pagseguro nga malayo sa peligro ang mga opisyales ug mga mag-uuma.

Ang sekretaryo sa DAR miabot kagahapon aron pangunahan ang paghimo sa Writ of Installation sa mga ARBs sa gikasamokan nga luna sulod sa Hijo plantation. 

Apan midesisyon ang hepe sa DAR nga i-langan ang pag-implementar sa kamandoan human sa pakigmiting kang Gobernador Anthony del Rosario, PNP-XI Deputy Regional Director for Operations PSSupt Valeriano de Leon ug ubang langkit nga mga ahensya aron gayod maseguro nga malayo sa peligro ang tanang nalangkit.

Nakombinsir ni Gob Anthony si Mariano human ipahayag ang iyang kabalaka labot sa kasegurohan sa mga mag-uuma ug sa uban nga langkit sa implementasyon.

“We want the installation to be done peacefully. I do not want anybody to get hurt,” matod sa gobernador.

Nga gi-konsiderar ang di pa dugay’ng hitabo niadtong Disyembre diin dunay nasamdan, gipatugbaw ni del Rosario ang iyang pangunang gikabalak-an.

“Nakadawat mi ug information nga . . . kung walay support gikan sa polis morag delikado pod ang kahimtang sa atong mga beneficiaries. Ang ato man gyod ginalikayan kining kagubot. . . Dili nato gusto nga ang resulta ani moabot gyod ta ug dili maayo nga sitwasyon parehas anang magpinusilay, . .magpatayan. . .So that is why akong gihangyo nga makig-dialogue muna ang PNP, ang DAR and of course together with other officials, the city mayor’s office in order to make sure na walang untoward incident ang mahitabo aning adlawa,” matod ni Gob del Rosario nga mipahayag sa iyang kabalaka.

Human sa sobra upat ka oras nga miting misugot ang sekretaryo sa DAR nga i-langan ang pag-instalar sa mga mag-uuma lakip na ang pagpahigayon ug inter-agency miting karong Byernes nga maghisgot sa mga butang himoon sa dili pa, atoll sa pag-instalar ug human sa instalasyon sa mga ARBs.

Gipasiugda sab ni DAR Usec Legal Affairs Luis Meindaro Pañgulayan labot sa kaimportante sa pagbutang ug police outpost ingon man ang inter-agency center diha sa maong lugar aron tubagon ang matag adlaw nga gikabalak-an sa mga benepisyaryo human sa instalasyon.

Gikalipay ug dako ni Gob AGR ang desisyon ni DAR Secretary Mariano.

“Nalipay pod ko kay finally naka-decide pod si Secretary Mariano nga i-postpone ang installation. As governor of this province, first and foremost man gud sa akong responsibilidad is the welfare of our constituents so importante gyod nga walay mahimong bloodshed karong adlawa,” matod sa gobernador.    

Gipasaligan sab ni gobernador del Rosario ang mga ARBs nga dili mawad-an ug paglaom sanglit ang kalangan maoy alang gayod sa ilang kaayohan.

“We are just taking all the precautionary measures to ensure their peaceful installation,” he assured,” pasalig sa gobernador.


 

More Davnor Updates at

DavNor Karon

 

DavNor News