News

DavNor finalist sa Most Business-Friendly, Most Competitive Province awards

Dugang pamatuod sa kalamposan sa maayong panggobyerno ni Governor Edwin “Kuya Gov” Jubahib ang pag-abante sa Davao del Norte, isip national finalist sa Most Business-Friendly (MBF) Province ug Most Competitive Province awards.

Atol sa final online judging sa MBF award kagahapong adlawa, Septyembre 26, 2023, gipresentar ni Kuya Gov sa Philippine Chamber of Commerce and Industries (PCCI) panel ang mga reporma ug kalamposan nga gihimo sa iyang administrasyon aron sa pag-agni sa mga mamuhunan ug sa pagsiguro sa maayong atmospera alang sa pagtubo sa ekonomiya.

Gibalita sab sa gobernador ang labaw nga pagdagsa sa mga investors human nadeklarang insurgency-free ang probinsya sa milabay nga tuig.

Dugang niya nga isip tubag sa dakong hagit sa Fusarium wilt nga nakaapekto sa industriya sa sagingan sa probinsya, nagpahulam siya og ekipo sa apektadong banana growers ug naghatag kanila og mga binhi ug ubang inputs aron tabangan sila pagbalhin ngadto sa laing high-value crops.

Dugang pa, malaumon gihapon si Kuya Gov nga masungkit sa Davao del Norte ang Top 3 Most Competitive Province sa nasud, human nahimong national finalist ang probinsya sa award nga ginahatag sa Cities and Municipalities Competitiveness Index (CMCI), uban sa Department of Trade and Industry (DTI).

Imbitado si Kuya Gov sa 11th Regional Competitiveness Summit ugmang adlawa sa Manila, aron sa pagdawat sa award.

Kini, samtang gitudlo sab ang probinsya nga “potential passer”, kon dunay dakong puruhan nga makadawat sa Seal of Good Local Governance (SGLG) karong tuiga, human ang SGLG national validation sa milabay nga semana.

Sa makausa pa, gihanyag ni Governor Edwin “Kuya Gov” sa katawhang Dabaonon ang kalamposan sa iyang administrasyon sa pagmugna og kalikopan alang sa paglambo sa negosyo, sa mas maayo nga paghatud sa serbisyo ug sa pagkunhod sa kapobrehon.

Kahinumdoman nga midaog ang Davao del Norte isip Most Business-Friendly Province sa tibuok nasud sa tuig 2019, samtang nagpabilin kining Top 10 Finalists sa MBF awards sa 2020, 2021, ug 2022.

Nagpabilin sab kini nga Most Competitive Province sa tibuok Visayas-Mindanao Region gikan pa niadtong tuig 2018, samtang nahimo kining ikaduhang Most Competitive sa tibuok Pilipinas sa 2020 ug 2021, ug ika-3 sa tuig 2022.

Dakong hinungdan ang padayong pagpanguna sa Davao del Norte isip paboritong lugar sa mga tigpamuhunan sa Davao Region, sanglit dunay P1.925-billion ka bag-ong capital ang gibubo sa mga investors sa milabay nga tuig.

Gikan kini sa 4,515 ka mga bag-ong gitukod nga negosyo, diin nakahatag kini og trabaho sa 63,855 ka mga Dabaonon. 

Bisan pa sa pandemya, duna gihapon kapin P3.6 bilyones nga kapital ang gibubo sa mga bag-ong negosyo sa probinsya sa unang termino ni Kuya Gov.

Writer/Photo: Noel P. Baguio

 

 

 

DavNor News