News

CDO nag-benchmark sa DavNor Sports and Tourism Complex

Gidayeg sa mga personahe sa LGU Cagayan de Oro City ang Probinsya sa Davao del Norte gumikan sa katukoran sa departamento alang sa mga kabataan ug isports atol sa gipahigayong benchmarking sa Davao del Norte Sports and Tourism Complex, Mankilam, Tagum City, niadtong Septyembre 15, 2023.

Gilibot sa mga delegado gikan sa maong siyudad ang mga pasilidad sulod sa sports complex sama sa swimming pool, oval, DavNor Training Center ug ang Davao del Norte Regional Sports Academy.

Sumala ni Jhon Michael Seno, ang SK Federation President sa CDO, nga buot nilang mohimo’g departamento nga susama sa Provincial Sports, Youth and Development Office kalakip sab ang katukoran sa usa ka sports academy.

“Ang una gyud namo nga tuyo mao nga giunsa pagpadagan ang usa ka departamento nga naglangkob ang sports ug youth. Kay sa dakbayan sa Cagayan de Oro, although we are at par kung moingon ta’g hisgutan ang youth and development program, pero medyo behind pud mi sa hisgutanan sa sports,” ingon ni Seno.

Nanghinaut si Seno nga makahimo siya og balaodnon nga magmugna sa Sports, Youth and Development Office sa ilang LGU sa dili pa mahuman ang iyang termino isip SK Federation President. Samtang nagpaabot sab kini sa iyang dakong pasalamat sa Probinsyal nga Panggamhanan sa Davao del Norte ubos sa liderato ni Governor Edwin “Kuya Gov” Jubahib gumikan sa paghatag kanila’g ideya nga magamit alang sa pagtuman sa iyang plano.

“Before I end my term, hopefully, mahuman gyud nato og mahimong mapasar ang gitawag nato’g sports and youth office sa dakbayan sa Cagayan de Oro and of course, ang ako gyung dakong pasalamat sa probinsya sa Davao del Norte nga mamahimo og nakalakip na sa akoang gipangbisitahan. In fact, sa dakbayan sa Cagayan de Oro, mao ni ang pinakauna namong gibisitahan nga lugar,” dugang niya.

Gikalipay ni Provincial Sports, Youth and Development Officer Giovanni Gulanes ang pagpaambit sa iyang kaalam ug kasinatian kabahin sa pagdumala sa iyang departamento. Gisaysay usab niya ang dakong suporta ni Kuya Gov sa pagpalambo sa mga programa kalabot sa isports ug pagpanindot sa mga pasilidad.

“Gipakita nato unsa ang mga projects, program, and activity sa sports hasta sa atong youth. Gipakita pud nato atong mga pasilidad. Giganahan kaayo sila. Nakaingon sila nga bantog ra diayng departamento ang DavNor gumikan diay kay dagko kaayo ang mga pasilidad. Ato pong gipanghambog kung unsa kadako ang suporta ni Kuya Gov, sa Sports Academy, sa DAVRAA, sa swimming pool nato ug sa ubang kalihokan sa paugnat sa kusog,” sulti ni Gulanes.

Nanghinaut si Gulanes sa mga delegado gikan sa CDO nga ilang maimplementar ang mga nakutlo ug nakat-unan sa ilahang pagbisita sa Probinsya.

Writer/Photo: Nestor Mata, Jr.

 

 

DavNor News