News

News

Serbisyong pang-Senior Citizens para Kapalong “milampas”

MILAMPAS kay dili lang mga Senior Citizens sa Kapalong, Davao del Norte ang nahatagan ug serbisyo panglawas kundili apil na ang ubang tigulang gikan sa lain-laing barangay nga gawas sa lungsod.

Bisan kung tumong sa BEST PEOPLE Serbisyo Caravan ni Gobernador Anthony del Rosario nga pangunang alagaran ang mga senior citizens sa barangays Maniki, Luna, Pag-asa, Mamacao ug Sampao, wala gayod pugngi ang ubang residente gikan Mamangan, New Loon, Santiago, Kamuning ug ubang barangay nga modawat sa libreng serbisyo panglawas bisan ang libreng lugaw ug paniudto.

“Kining serbisyo nato dili man ni pamolitika. Serbisyo man gyud ning tinuod kay mao man gyod ni ang mandato nato nga mga opisyales nga maningkamot ta nga makahatag ug serbisyo ug pag-alagad sa atong mga lumulupyo dinhi ug tibuok lalawigan sa Davao del Norte. . Dire sa atong probinsya, wala mi nangayo ug card. Ang among ginatabangan, tanan katawhan sa atong probinsya. Wala mi pili-pili unsay kulay na sila, unsay partido nila, basta nagakinahanglan ug tabang, kinahanglan tabangan gyod nato kay mao man ang trabaho nato,” ang kanunay gipalanog nga mensahe ni Gobernador Anthony del Rosario matag hatod sa Serbisyo Caravan.

Ang Ata-Mandaya nga magtiayon nga taga Santiago, Asuncion, Davao del Norte, 76-anyos nga si Mr. Macawhat kauban sa asawa nga si Laureana Panimbo Macawhat, 87 anyos, maoy pipila lang nga nakadawat serbisyo alang sa mga senior citizens.

“Kaning Mandaya, Ata, nagkasagol na mi. Nagpasalamat ko uyamot karong adlawa sugod adtong Lunes. Nagpasalamat ko’g dako nga aduna ko’y mga problema sa akong lawas nga natabangan ko sama sa akong mata nga di ko kaklaro kaayo. Nagpasalamat ko karon kay ania sab mong tanan,” matod ni Mr Macawhat nga nagpakita sa iyang referral slip paadto ug Davao Regional Medical Center tungod sa sakit sa tiil sa iyang asawa. 

“Magpatabang ko sa akong tiil kay di ko katindog kaayo, di ko kalakaw,” dugang ni Laureana Panimbo Macawhat.

Ang magsoon nga Helter Ariete 74 anyos, uban sa manghod nga 67 anyos nga si Rosita mapasalamaton sa Serbisyo Caravan hatod sa probinsya apan nagmahay sa mga opisyales sa ilang barangay tungod sa wala pagpahibalo sa 5 ka adlaw nga serbisyo dala sa BEST PEOPLE.

“Maayo kaayo kay gidala na dire unya dili nami magpalayo. Salamat kaayo kay Governor. Natingala ko ani nga programa nga wala man gipahibalo sa barangay. Nga dapat unta kay programa man ni sa gobernador gipahibalo unta mi. Unya kani nga programa wala gyod mi kahibalo. So, gi-pamolitikal nila,” pintok nga estorya ni Rosita tumong sa mga opisyales sa iyang barangay.

“Ako, tinuod di ko mahadlok nga motug-an gyod kay giingon man nga ang gobernador daw walay natabang. Isa ko, isa ko nga nikuan kay dati kong konsehal sa una unya nitabang ang gobernador, kanang mga eskwelahan. Kana si Congressman igo lang nagdugang. Dili kay walay natabang ang gobernador kay ang tanan namo nga gipalandongan iya sa province, siya na ang gobernador,” dugang pagpadayag ni Rosita.

Kanunay gigahinan ug isa ka adlaw nga serbisyo ang mga Senior Citizens matag hatod sa halos usa ka gatos nga serbisyo sa BEST PEOPLE Festival of Services nga naglakip sa check-up sa panglawas ug mata, Digital Rectal Exam alang sa mga lalaki, operasyon sa gagmay nga mga bukol ug uban pa.


 

More Davnor Updates at

DavNor Karon

 

DavNor News