Davao del Norte – Usa ka dosena nga mga gagmayng kooperatiba sa probinsiya ang nakadawat sa mga computer sets, isip ilang daog sa gipahigayon nga raffle draw atul sa gipahigayon nga Cooperative Summit.

Gihatag ni Kuya Gov. Edwin I. Jubahib ug 2nd District Congressman Alan Dujali ang mga computer aron padayong mapalig-on ang mga kooperatiba, nga dako’g tabang sa pag-uswag sa sosyo-ekonomikanhong paglambo sa katawhan.

Si Provincial Administrator Engr. Josie Jean Rabanoz niingon nga dako gayod ug tabang ang computer sets para sa mga operasyon sa mga kooperatiba ug sa pagtukod sa ilahang nagkada-iya na data base para mas sayon ang pagtabang kanila sa gobyerno.

“Kani nga project ato ning support sa atong mga cooperatives diri sa Davao del Norte ug hinaot kini makatabang sa ilahang operations, sa ilahang offices ug isa ani ang pag establish sa ilahang data base na sa atong nahibal-an, dako kaayo ug tabang ang computers,” ingon ni Rabanoz.

Sulti sab ni Cooperative and Investment Development Division (CIDD) Chief Engr. Humber Cabunoc nga importante ang mga computer aron mabuhat sa mga coop ang ilang reportorial requirements.

Matod niya nga ang kakulangon sa gamit maoy rason ngano dili dayon makasunod ang mga kooperatiba sa mga ginapangayo nga report sa concerned agencies, sama sa Cooperative Development Authority (CDA).

“Naa mi mga inisyatibo gikan sa Provincial Cooperative and Development Council nga mangita ug mga personalidad nga mag pledge ug makahatag sa computers para sa atong micro cooperatives maong among giduol si Kuya Gob ug si Cong. Dujali. Supportive kayo sila, wala silay pagpanupo sa paghatag ug pag-extend sa maong assistance ngadto sa atong micro and small cooperatives,” gipahayag ni Engr. Cabunoc.

Si Jaime Diamante, ang manager sa Doña Andrea Agrarian Reform Beneficiaries Cooperative (DAARBMCO) nagkanayon nga dugay na silang nangandoy nga maka-angkon og bag-ong computer, nga dako’g tabang sa ilang data banking ug sa profiling sa ilang mga miyembro.

“Nalipay kaayo mi tungod kay dako ni nga savings sa amo nga wala nakaya sa among budget unya nakahatag ni ug dakong tabang sa atong kooperatiba labi na sa mga mag-uuma. Daghang salamat kaayo sa administrasyon ni Kuya Gob,” dugang pa ni Diamante.