Ipatuman ni Kuya Gov. Edwin I. Jubahib ang “No Quick Response (QR) Code, No Transaction” policy sa probinsya, isip lig-on nga pamaagi aron malikayan ang grabeng pagkuyanap sa sakit nga COVID-19 sa probinsya.
Target sa gobernador nga ma-implementar ang Davao del Norte COVID-19 Contact Tracing System sa unang semana sa Agosto, isip mahinungdanong lakang aron dali pagsubay sa mga na-exposed sa COVID-19 kung dunay mag-positibo sa sakit sa probinsya.
“Lisod kaayo ang pag-contact tracing. Mao nga mugamit kita og teknolohiya aron dili mukaylap ang sakit kay dili kaya sa atong mga hospital kung mograbe pagdaghan sa kaso sa probinsya,” sulti ni Kuya Gob.
Wala nay local transmission nga natala sa probinsya. Pero, duna na puy dugang nagpositibo gumikan sa pag-abot-abot sa mga Overseas Filipino Workers (OFWs) ug mga Locally-Stranded Individuals (LSIs) tungud sa Hatid Probinsya program sa panggamhanan.
Gikahadlokan sa gobernador nga modaghan pa ang kaso kung dunay mga OFWs nga makaderetso sa ilang mga panimalay og dili moagi sa saktong health screening og quarantine.
Dunay gipaandam si Kuya Gob nga 2 milyones ka nga QR codes, diin ang mga indibidwal nga dunay pangidaron nga sais anyos pataas ang kinahanglan nga marehistro sa system.
Ang mga bisita nga gikan sa laing lugar ug mga silingang dapit sa probinsya hatagan sab og Visitors’ QR Code aron matarong sila’g monitor, ug aron masuta sab dayon kung kinsa ang ilang nakauban pag-ari sa probinsya kung sila magpositibo.
Sugdan sa pag-implementar sa QR Code sa mga pampublikong buhatan sa probinsya, usa isunod ang mga pribado nga mga establisimento.
Sa pagtuyok sa gobernador sa mga lungsod ug siyudad, mihatag siya ug mga cellphone sa tanang mga kapitan, kauban ang pang-load, aron gamiton nga scanner sa QR Code.
Ang Davao del Norte ang ika-duhang probinsya nga nimugna sa iyang sarili nga electronic contract tracing system, nga gihimo mismo sa IT department sa Kapitolyo.
Bisan isulod sa system ang importanteng mga datos sa usa ka tawo, gipasalig sa gobernador nga dili maabuso ang maong QR system sanglit misubay kini sa Data Privacy Law, ug nagtumong lang jud kini para gamiton sa contact tracing ug wala nay lain pang katuyoan.
