Usa sa pinaka-apektadong sektor sa pagsugod sa community quarantine sa probinsiya mao ang mga tricycle, multicab, jeepney ug bus drivers.

Sa pagpaimplementar sa 50% seating capacity agi'g pagsunod sa minimum health protocol sa atong public utility vehicles, mas nimenus ang sakay'ng pasahero hinungdan sa pagkunhod sa ilang kita matag adlaw.

Tungod niini, dako ang kahingawa ni Kuya Gob Edwin Jubajib sa kahimtang sa mga apektadong draybers. Gawas sa mga nila, gitagad sab sa gobernador ang mga Barangay Health Workers (BHW) ug Barangay Nutrition Scholars (BNS) tungod sa ilang sakripisyo ug serbisyo isip frontliners sa barangay level.

Dugang pahimangno sa gobernador nga di gyud pasakyon ang mga pasahero nga wala nagsul-ob ug face mask alang sa ilang kaugalingong proteksyon ug sa ilang pamilya. Hangyo ni Kuya Gob na sila na pud mamadlong kung naay makita nga kaubang drayber nga wala nag-face mask.

Sa datus sa PSWDO Rosalinda Rapista, kapin 17, 151 nga mga draybers, 2, 648 nga BHWs ug 275 nga BHS ang mga nahataga’g tag-5 ka kilong bugas. Way puas gihapon ang pagpahinumdon ni Kuya Gob sa pagtuman sa minimum health standards ug ang hugot nga kampanya sa Food Sufficiency Program sa probinsiya pinaagi sa KAAGAPAY (Kawsa sa
Agikultura ug Panginabuhian sa Barangay), padayon nga road widening ug concreting sa pakig-alayon ni 1 st District Congressman Pantaleon Alvarez ug ang Zero Billing Program sa atong provincial hospitals.

Gipasalig usab niya nga andam ang probinsiya motabang sa mga problema sa patubig. Kontakon lang ang LGUs aron ipadala gilayon ang mga ekipo sa probinsiya sa paghimo’g irrigation system.

Bisan sa gamay’ng hinabang ni Kuya Gob, dako ang pagpasalamat sa mga draybers sa ilang nadawat.