BISAN sa naani nga mga kalamposan ug pasidungog sa 2017, alang sa tuig 2018 tutokan sa administrasyon ni Gobernador Anthony del Rosario ang ikaduhang letrang “P” nga nagkahulogang ‘Public-Private Partnership’ ug letrang “L” nga ‘Link to the World’ diha sa BEST PEOPLE development agenda ilawom sa Abilidad at Malasakit (AMA) nga matang sa pagdumala sa probinsyal nga panggamhanan.
Kini ang gipamahayag sa gobernador atol sa year-end Kapihan sa Kapitolyo, kagahapon, Disyembre 19 nga nagtan-aw sa tibuok tuig nga implementasyon sa BEST PEOPLE.
“Two particular items. Number one is Public-Private Partnership program ug ang ikaduha kadtong Link to the World; challenge gyod nga kinahanglan nato tutokan. .More especially on the public-private partnership kay importante man gyod nga maapil ang private sector dire sa mga programa sa gobyerno kay pinaagi sa ilahang tabang sa private sector mas daghan gyod ta ug mahimo,” pasabot sa gobernador sa iyang naobserbahan nga wala pa kaayo mapakusog pag-implementar.
Malaumon ang gobernador nga sa sunod tuig mapakusog ang public-private partnership diha sa lain-laing programa alang sa katawhan sa Davao del Norte ilabina nga gihingusgan ang nasyonal nga programa ni Presidente Rodrigo Duterte nga Build, Build, Build.
Ingong agrikultural nga probinsya, gipasiugda ni Gobernador Anthony ang panginahanglan nga i-improve gayod ang lokal nga mga produkto aron sayon kini ibaligya diha sa mga silingang nasod sa ASEAN ilabina sa BIMP-EAGA.
“Link to the World. While the concern of Davao del Norte. . our agri-businesses, kinahanglan gyod nga ma-improve nato ang quality sa atong mga produkto para mas dali siya ibaligya sa gawas especially the ASEAN. . the BIMP-EAGA kay mas duol ra man. . Sayang kaayo ang oportunidad,” pagpasiugda sa gobernador.
Ang BEST PEOPLE nagkahulogan ug Balanced Ecology, Enhanced Agriculture, Sustainable Tourism, Transformative Leadership, Public Infrastructure, Education and Sports Development, Optimum Health and Social Services, Public-Private Partnership, Link to the World ug Employment and Livelihood Opportunities nga nagsilbing giya sa pag-implementar sa mga programa sa administrasyon.
Tungod sa maong implementasyon, pipila sa daghang pasidungog nga nadawat sa 2017 naglakip ingong nag-inusara sa 82 ka probinsya sa tibuok Pilipinas nga giilang Galing Pook Awardee. Gikan sa ika 15 nga pwesto, miambak sab ang DavNor ngadto sa Numero 7 ingong Most Competitive Province ug nahimong Most Competitive Province sa Rehiyon XI.