Walay langan nga gisugdan gyud dayon kaganihang buntag ang pagtahi sa mga face masks nga iapod-apod sa mga katawhan sa Davao del Norte isip pangunang proteksyon sa pagkuyanap sa new coronavirus o COVID-19.

30 ka mga makina na karon ang nagaandar human niabot kagahapon ang 26 ka mga makina nga gimando nga paliton ni Kuya Gov Edwin I. Juhabib aron mapadali ang plano sa probinsyal nga panggamhanan nga muhimo ug 16,200 ka mga face masks sulod sa 6 ka adlaw.

Gi-komisyon sa Provincial Administrator's Office-Employment and Workforce Development Division (PAdO-EWDD) ang 30 ka mga mananahi aron maapas ang gi-target nga kadaghanon sa face masks. Makadawat ang mga mananahi ug 5 pesos kada face mask nga mahimo ug libreng paniudto kada adlaw.

Sumala pa ni Ms. Gloria Pamugas, Division Head sa PAdO-EWDD, kini nga lakang maoy tubag sa kakulangan sa mga face masks nga mapalit bisan asa sa probinsya. Dako usab kini nga tabang sa mga Dabaonong naundang sa trabaho tungod sa hulga sa COVID-19.

Dako usab ang pasalamat ni Raymundo Salagoste, usa ka mananahi ug lumulopyo sa Cambanogoy, Asuncion nga nahatagan sya ug higayon nga makatabang usab sa gobyerno labi na sa sitwasyon nga kinahinglan niini ang ayuda sa katawhan.

Aduna usab mga empleyado sa kapitolyo nga niboluntaryo nga mutabang. Isa niini si Maria Belen Lagitao sa PAdO-Information Technology Division nga nigahin ug oras human sa iyang trabaho aron makatabang sa pagtahi.