GIKLARO ni Davao del Norte Gobernador Kuya Gov. Edwin I. Jubahib nga ang iyang pagdili (ban) sa pagbaligya sa abot nga palay sa probinsya maoy ngadto sa laing rehiyon way labot ngadto sa mga probinsya sulod sa Region XI.
Ang Rehiyon XI gilangkoban sa mga probinsya sa Davao de Oro, Davao del Norte, Davao Oriental, Davao del Sur ug Davao Occidental. Sulod sab ang Davao City sa Rehiyon XI.
“Walay ingon nga i-ban sulod sa Davao Region,” matod ni Kuya Gob ngadto sa mga sakop sa media adtong Lunes.
Gipasabot sa gobernador nga iya nang gihunahuna daan nga ang Davao del Norte ug ang tibuok rehiyon adunay igo nga pondo sa palay panahon sa implementasyon sa ‘community quarantine.’
“Siyempre maniguro ta dinhi sa atong province ug sa atong region kay regional lockdown man ta. Magtabangay ming mga probinsya ug ang siyudad sa Davao, kung unsay kulang didto nga maka-supply pud ta gikan sa atong probinsya,” pasabot ni Kuya Gob.
Una pa niini, nakaani ug batikos si Kuya Gob gikan sa mga tigbaligya ug mamalitay sa palay sa Davao del Norte labot sa iyang pagdili nga ibaligya ang mga abot gawas sa probinsya niadtong Marso 27, 2020.
Ang maong direktiba gibawi dayon pagka-sunod adlaw ug gipatuman ang Order labot sa ‘walay langan’ nga paghatod sa mga basic goods sulod ug gawas sa probinsya agi’g pagsunod sa kasugoan sa Department of Interior and Local Government (DILG) sumala sab sa Memorandum Circular numero 9 sa Department of Agriculture (DA) sayo ning bulan sa Marso.
Dugang giklaro ni Kuya Gob nga mihimo dayon siya ug aksyon dihang iyang nasayran nga ang mga negosyante sa ubang rehiyon nangabot aron mamalit ug palay tungod sa sayo nga pag-harvest dinhi sa Davao del Norte.
“Mao nga akong gisiguro ug ako gyung gipabantayan nga dili madala sa laing region ang atong supply” pagklaro ni Kuya Gob nga nagpasalig nga iya gyod paneguroon nga paspas ang paghatod sa gikinahanglang basic goods sulod sa rehiyon samtang gipatuman ang regional lockdown.
Gitug-an sab ni Gobernador Jubahib nga sukad sa iyang pagpagawas sa Order, ang lokal nga kapulisan nagdili na sa mga negosyante’g palay gikan sa laing rehiyon aron mamalit ug humay dinhi sa Davao del Norte.
Apil na niini ang negosyante gikan sa Surallah, South Cotabato nga nadakpang nagbiyahe’g humay gikan sa Asuncion, Davao del Norte.
Gimando sa Gobernador nga kumpiskahon ang karga nga palay, hinuon, gibayran ang negosyante.
Ang naembargo’ng humay idugang sa giandam nga mga food packs nga i-‘augment’ sa probinsya sa giapod-apod sa mga LGUs ngadto sa matag panimalay.
