GITAGAN-AN sa lokal nga panggamhanan ni Mayor Jonnie “Onet” Libayao ang panginahanglan sa bayente-uno ka mga tawo nga na-stranded sa utlanan sa Rehiyon 10 ug 11, entry checkpoint sa Sitio Natulinan, Talaingod, Davao del Norte.
Sa pagbisita sa DavNor Provincial Information Knowledge Management Office (PICKMO) niadtong Abril 3, miabot na ug lima ka adlaw nga stranded ang isa ka babaye nga gusto mosulod sa Davao del Norte nga diha lang “gipapuyo” sa tent tapad sa checkpoint samtang ang uban upat na sab ka adlaw nga anaa “nagpuyo” sa ilang mga sakyanan nga gikan pa sa Rehiyon 10.
“Ang na-standed dire twenty-one kabuok. Ang uban gikan sa Sibugay, Zamboanga, nagkalain-lain ang gigikanan. Among gi-abot ang problema sa na-stranded: pagkaon, suporta mga higdaan, mga pagkaon gikan pod sa DavNor, unya sa ilang gikinahanglan nga requests samtang nia pa sila sa boundary, gihatod dire,” matod ni matod ni Ms. Susan Saylo sa Talaingod Municipal Health Office nga wala na mag-detalye sa mga panginahanglan ilabina ang alang sa mga babaye.
Ang Inter-Agency Task Force nga nagbantay sa entry checkpoint sa Sitio Natulinan gilangkoban sa Talaingod MHO, MAGRO, DSWD, PNP ug AFP nga mao ang Ground Commander. Lakip sab nga gipahimutang sa entry checkpoint ang mga personahe sa Provincial Veterinary Office sanglit hugot nga gibantayan nga dili makasulod ang African Swine Flu (ASF) sa probinsya.
“Maayo man among kahimtang inubanan pod sa AFP, PNP ug kami sab nga taga-Local MHO, MAGRO ug DSWD. Among ginabuhat proseso, pero usahay di lalim ang mga tawo pasabton kay bisan nakasabot gusto man gyod nila nga ang ilang gusto maoy matuman kay gusto lagi mouli sa ilang pamilya. Pero nagsunod mi sa Order o patakaran nga dili sa jud kay nag-lockdown ta dire sa Region XI,” dugang pahayag ni Saylo sukad niadtong Marso 19 na-asayn nga nagpasabot nga duna gyod gahian ug ulo nga tawo.
Bisan kung bukid na ang Sitio Natulinan apan gipahimangnoan gihapon ang komunidad nga dili magtapok-tapok ug dili magkumpyansa.
“Among gina-estoryahan nga dili sa magtapok, ang uban nagpuyo sa ilang mga balay. Pero dili gyod kalikayan ang uban mohangyo gyod sa amoa nga naa sila’y paliton. Ang among arrangement, kung naa sila’y ibaligya diha lang, pero dili gyod sila kagawas, magdawatay na lang sila,” pagklaro ni Ms Saylo sanglit barikada ra gyod ang utlanan sa Rehiyon X ug XI.
Hinuon pagka sunod adlaw gikuha na sa probinsyal nga panggamhanan ni Gobernador Kuya Gov. Edwin I. Jubahib pinaagi sa DavNor IATF on COVID-19 ug gibutang ingong mga Persons Under Monitoring (PUMs).
