PUNO sa kadasig ug malipayon nga miapil sa pagpang-ugbok ang mga estudyante aron timan-an ang dalan padulong sa tukoron nga mga bilding sa Datu Jose A. Libayao Davao del Norte State College (DNSC) Extension Campus didto sa Sitio Salawao, lungsod sa Talaingod.

Tungod sa kalay-on, sa sayong bahin sa tuig 2016 gilusad sa Davao del Norte Learning Institute-Davao del Norte State College (DNLI-DNSC) ang Datu Jose A. Libayao-DNSC Extension College nga sa kasamtangan naggamit sa mga bilding nga gipanag-iyahan sa Municipal Tribal Council. Ang laing duha ka gihulaman nga bilding gigamit ingong boarding house sa mga lalaki ug babaye estudyanteng Ata-Manobo nga nag-eskwela sa kursong Diploma on Agricultural Technology (DAT).  

“Karon atoa lang sa ni i-sticking kay balikan ni sa Planning ilaha ning himoan ug distansya, exact accuracy. . ang sticking naa sa interval nato nga 10 meters. Gikan dire estimate lang ta, dili gyod ing-ana ka exact ten meters pero at least naa ta’y estimation nga 10, mao na ang atong interval padulong didto, sa tumoy matod ni Mr. Arvin Gutang sa DNSC main campus, Panabo City nga naghatag direksyon sa duha ka grupong estudyanteng mang-ugbok sa timaan padulong sa campus site.

Ang sobra P200 milyones kantidad nga mga bilding maoy sulod sa 16 ektaryas nga luna nga magsilbing demonstration farm alang sa pagpanguma ug pamuhi ug mga hayop lakip na ang produksyon sa gatas. Ang dugang 10 ka ektarya gi-proseso na sab aron madugangan pa ang demo farm.

Kahinumduman nga niadtong Septyembre, 2017, mismong si Department of Agriculture OIC Regional Director XI Engr. Ricardo Oñate, Project Director sa PRDP ang nagsugyot nga iapil ang gatas sa Provincial Commodity Investment Plan (PCIP) sanglit adunay dairy processing plant na ang probinsya diha sa lungsod sa New Corella.   

Ang DavNor adunay 10 na ka PCIPs alang sa 10 ka produkto nga naglakip sa cacao, banana (cardava), cassava, coconut, coffee, durian, mangga, oil palm, rubber ug abaca. ang laing tulo ka mga produkto nga himoanan pa ug PCIP naglakip sa ang kanding (Chevon), swine ug bangus.

Ingong agrikultural nga probinsya ilawom sa BEST PEOPLE development agenda, tumong gayod sa administrasyon ni Gobernador Anthony del Rosario nga matudloan sa eksaktong kahibalo ang mga mag-uuma lakip na ang mga Ata-Manobo sa Talaingod tungod sa kalapad sa luna nga ilang ginsakpan. Apil na niini ang pagpamuhi ug hayop ug ang pagpadaghan sa gatas.

Niining tuiga gilaoman nga adunay mahuman nga bilding ma magsilbing permanenteng klasehanan sa mga estudyante.

Gawas sa kursong DAT, ang DNLI-DNSC naghimo sab ug espesyal nga klase sa Bachelors in Public Administration alang sa wala kahuman ug kurso nga mga empleyado sa munisipyo sa Talaingod.