ALSlympics 2025: Una sa nasud, gipasiugdahan sa Davao del Norte
- Details
- Published: Tuesday, 15 April 2025 16:57
- Written by DavNor PICKMO (Maria Lorna P. Tripoli)
- Views: 4
Gipasiugdahan sa Davao del Norte ang pinakaunahang ALSlympics sa tibuok Pilipinas, usa ka talagsaong sports ug talent competition alang sa mga Alternative Learning System (ALS) learners. Karong tuiga, mao na ang ikaupat nga tuig niini nga gipahigayon sa DavNor Gym, Sports Complex, Mankilam, niadtong Abril 12–13, 2025.
Gipahigayon ang ALSlympics 2025 pinaagi sa panaghiusa sa Department of Education (DepEd) ug sa Provincial Sports and Youth Development Office (PSYDO), ubos sa suporta sa Probinsyal nga Panggamhanan ilawom sa liderato ni Governor Edwin I. Jubahib, ubos sa tema nga: “Compete, Excel, Inspire: ALS Rise to Greatness.”
Tumong sa maong kalihokan ang pagdasig sa mga out-of-school youth nga mobalik sa eskwelahan ug humanon ang ilang edukasyon, ilabina nga ang diploma sa ALS mahimong gamiton isip “stepping stone” padulong sa kolehiyo. Sumala ni PSYDO Head Giovanni Gulanes, pinaagi sa sports, mas madani ang kabatan-onan nga mopadayon sa ilang pagkat-on.
“Ang inyong diploma sa ALS magamit nato na kung gusto nato molampos magpaenrol didto sa college,” matod ni Gulanes.
Gisaysay usab ni Gulanes nga ang ALSlympics sa Davao del Norte mao pa lang ang unang matang niini sa tibuok nasud—wala pa kini sa laing rehiyon ni sa national level. Gipaluyohan kini aron mapakita nga ang mga ALS learners adunay parehas nga kapasidad ug potensyal sama sa mga regular nga estudyante nga mosalmot sa DAVRAA.
Gilangkoban ang mga partisipante sa upat ka grupo: DavNor Pioneers, Samal Waves, Banana Magnates, ug We are Tagum. Nagtigi sila sa mga kalihokan sama sa paugnat sa kusog, Zumba, vocal duet, spoken poetry, basketball, volleyball, ug ang gipabonggang Ginoo ug Binibining ALSlympics 2025.
Naangkon sa Samal Waves ang korona sa Ginoo ug Binibining ALSlympics 2025, samtang nakakuha sa 1st runner-up ang DavNor Pioneers, 2nd runner-up ang We are Tagum, ug 3rd runner-up ang Banana Magnates gikan sa Panabo City.
Ang ALSlympics usa lamang sa mga inisyatiba sa probinsya aron mapalig-on ang suporta sa Alternative Learning System, nga usa ka mahalagang plataporma para sa edukasyon sa mga kabus ug naundang sa pag-eskwela.
Writer: Lorna Tripoli
