Transition plan sa DLPC takeover sa Nordeco gilatag na
- Details
- Published: Friday, 27 June 2025 07:34
- Written by DavNor PICKMO (Noel P. Baguio)
- Views: 14
Gilatag sa Davao Light and Power Company (DLPC) ang transition plan (TP) alang sa pagpuli niini sa franchise coverage area sa Northern Davao Electric Cooperative (NORDECO) sa Davao del Norte ug Davao de Oro.
Gipresentar nila AboitizPower Chief Operating Officer for Distribution Utilities Anton Mari Perdices ug DLPC President and Chief Operating Officer Engr. Enriczar Tia ang plano ngadto kay Governor Edwin “Kuya Gov” Jubahib niadtong, Hunyo 23, 2025.
Ang maong Transition Plan milatid sa mga preparasyon nga pagahimoon sa DLPC aron masiguro ang hapsay nga pagtugyan sa pag-expand sa operasyon niini sa duha ka probinsya, subay sa Republic Act No. 12144.
Nahimong kini nga balaod niadtong April 6, ning tuiga aron palapdan ang franchise area sa DLPC ngadto sa Island Garden City of Samal, Tagum City, Asunción, New Corella, San Isidro, Talaingod ug Kapalong sa Davao del Norte ug sa tanang mga lungsod sa probinsya sa Davao de Oro.
Daan nang sakop sa operasyon sa DLPC ang Panabo City, Carmen, B.E. Dujali, Sto. Tomas, ug pipila ka mga barangay sa Kapalong.
Nahilakip sa balaod ang duha ka tuig nga transition period alang sa pagtaod sa mga poste ug uban pang kinahanglanong mga imprastraktura.
Una nang gibutyag ni Perdices nga mokabat ngadto sa P700 million hangtud P1 billion ang gibanabana nga maggasto sa DLPC aron sa pagkuha sa mga asset sa NORDECO.
Lakip niini ang pag-upgrade nila sa mga distribution transformers, linya sa kuryente ug mga metering system, aron makatagamtan ang mga konsumante sa bag-ong franchise area sa dekalidad nga serbisyo niini.
Mapasalamaton si Kuya Gov sa misuporta kaniya sa iyang pagduso sa Kongreso ug Senado sa dakong isyu sa daut nga serbisyo sa kuryente sa probinsya, labi na ang mga mayor sa mga LGU sa District 1 ug sa Island Garden City of Samal.
Kahinumdoman nga nahimong hinungdan sa dugang nga 30-day preventive suspension ni Kuya Gov sa milabay nga tuig ang iyang aktibong kampanya aron masulbad ang dugay nang mulo sa katawhan batok sa sige’ng brownout, mahal nga kuryente ug way ayo nga serbisyo sa NORDECO, nga usa ka “public welfare issue”.
Writer: Noel Baguio
