KAAGAPAY nagpalambo sa panginabuhian sa mga benepisyaryo sa Tagum City
- Details
- Published: Monday, 07 September 2026 05:05
- Written by pioDavNor
- Views: 18
Nakasugod og dugang nga panginabuhian ang Masaganang Simula ng Pagsasaka (MASIPAG) Association sa Purok Maligaya, Barangay Mankilam, Tagum City, gamit ang kita nga ilang nakuha gikan sa free-range chicken ubos sa programa sa Kawsa sa Agrikultura ug Panginabuhian sa Barangay (KAAGAPAY) nila ni Governor Edwin I.Jubahib ug Vice Governor Clarice T. Jubahib.
Gisulti ni MASIPAG Association President Berlyn Moncas Basagan nga gikan sa kapin P67,000 nga halin sa free-range chicken, nakatigom sila og kapital aron makasugod sa ilang ihaw-ihaw ug pagbaligya og karneng baboy. Iyang gipadayag kini atol sa pagbisita sa KAAGAPAY Team sa ilang asosasyon niadtong Septyembre 4.
Dugang pa ni Basagan, nadugangan usab ang ilang kapital alang sa Sustainable Livelihood Program (SLP) human sila makadawat og P150,000 nga pahulam gikan sa probinsya, nga adunay duha ka porsyentong interes matag tuig, alang sa pagpalapad sa ilang panginabuhian.
Gawas sa ihaw-ihaw, gipalapdan sab sa MASIPAG Association ang ilang mga produkto pinaagi sa paghimo ug pagbaligya og embotido, ingon man ang pagbaligya og mga linutong sud-an. Sumala kang Basagan, ilang gibanabana nga mokabat sa P250,000 ang ilang kinatibuk-ang kita gikan sa free-range chicken, ihaw-ihaw ug uban pang panginabuhian.
Samtang, nagpadayon usab sa pagpalambo sa ilang panginabuhian ang magtiayong Joselyn Montillano ug Paquito Crisostomo Montillano sa Purok 2B, Barangay La Filipina, diin ilang gipangulohan ang asosasyon nga La Filipina KAAGAPAY sa Gulayan.
Gipahayag sa magtiayon nga dako og natabang sa ilang panginabuhian ang manokan ug gulayan nga ilang gipadagan ubos sa KAAGAPAY. Ilang gitigom ang kita gikan sa free-range chicken isip pondo sa asosasyon ug gipahulam kini ngadto sa mga miyembro nga adunay tukmang interes.
Gibanabana nila nga mokabat sa kapin P100,000 ang ilang makolekta sa Disyembre niining tuiga. Padayon usab ang ilang pagpanguma og mga utanon sama sa okra, kalabasa ug batong, nga gitanom ni Montillano sa 3,900 square meters nga umahan.
Gipasalamatan sa magtiayong Montillano ang KAAGAPAY Program tungod sa dakong tabang niini sa ilang panginabuhian, ilabina ang libreng manok, feeds ug mga semilya sa utanon.
Nagpadayag usab og dakong pasalamat ang mga benepisyaryo ngadto sa administrasyong Jubahib-Jubahib tungod sa padayong suporta sa mga mag-uuma ug sa mga programa nga nagtumong sa pagpalambo sa ilang panginabuhian.
