News

28 kanhing rebelde, nakadawat ug ayuda gikan sa panggamhanan

Malipayon nga gidawat sa 28 ka mga kanhing rebelde ang ayuda gikan sa panggamhanan nga personal nga gitunol mismo ni Governor (Kuya Gov) Edwin I. Jubahib didto sa 60th Infantry Batallion, Doña Andrea, Asuncion.

Upat ka mga kanhing NPA combatants ang nakadawat ug P65,000 nga livelihood assistance ug 24 ka mga miyembro sa militia ng bayan ang nakadawat usab ug P15,000 isip financial assistance. Ang 28 ka mga kanhing rebelde nag-gikan sa Sitio Tapayanon nga nahisakop sa Barangay Gupitan sa Lungsod sa Kapalong.

Ang maong ayuda ubos sa Enhanced Comprehensive Integration Program o ECLIP adunay tumong nga matabangan ang mga kanhing rebelde nga mamuyo sa komunidad nga luwas sa kakuyaw ug dunay igong kapital aron sugdan ang bag-o ug hapsay nga kinabuhi. Kini subay sa katuyuan sa gipakanaog nga Executive Order No. 70 ni Presidente Rodrigo Roa Duterte nga maundang na ang lokal nga armadong pakigbisug o End Local Communist Armed Conflict (ELCAC).

Dugang niini, nisaad usab si Governor Jubahib nga buhatan ug balay ug eskwelahan ang mga kanhing rebelde. Sila usab pagahatagan ug ayudang pang-agrikultura nga gilangkuban sa mga high-valued crops sama sa gulay, sorghum, falcata, mahogany, lubi ug uban pa ug mga hayop nga alimahan ug pasanayon aron masiguro nga duna silay igo nga suplay sa pagkaon ug dugang panginabuhian. Kini ubos sa bag-ong programa sa Probinsyal nga Panggamhanan sa Davao del Norte nga gitawag nga DavNor Kaagapay o KAwsa sa AGrikultura ug Panginabuhian sa barangaY.

 

DavNor News