Gipasundayag sa mga Persons Deprived of Liberty (PDL) sa Davao del Norte Provincial Rehabilitation Center (DPRC) ang ilang talento sa pag-awit, pagsayaw, ug pagtula atol sa panapos nga programa sa Women's Month Celebration niadtong Marso 28, 2025. Taliwala sa nagharang nga seldang bakal, ilang gipakita ang determinasyon sa pagpangita og positibong kabag-ohan sa ilang kinabuhi.
Sumala ni Provincial Warden Marilyn Erolon, kasamtangang adunay 126 ka PDL sa DPRC, ug aktibo silang nipartisipar sa maong kalihokan nga nagdala sa tema “Babae sa Lahat ng Sektor, Aangat ang Bukas sa Bagong Pilipinas.” Gipasabot niya nga ang selebrasyon usa ka pahinumdom sa bililhong papel sa kababaenhan, bisan asa sila dapita.
“Kini nga selebrasyon aron mahinumdoman nato, kanunay kung unsa kamahinungdanon ang papel o role sa atong kababaehan sa gawas man o diri sulod sa atong balay bakasyonanan sa DPRC para ato silang respetohon,” ingon ni Erolon.
Sa mensahe ni Governor Edwin I. Jubahib nga gihatod ni Jemuel Melmida, iyang gipasiugda ang bili sa mga kababaenhan ug ang ilang katungod sa ikaduhang higayon sa kinabuhi. "Every woman deserves a second chance," matud niya, “Ang inyong kahimtang karon dili inyong katapusan. Ang importante nagapaningkamot mo nga mausab, molambo, ug mag-andam sa maayong kaugmaon”.
Nalipay usab ang mga PDL nga kababaenhan pinaagi sa pagpanghatag kanila og mga regalo, samtang gipakita nila ang ilang mga ginama isip panginabuhian sulod sa DPRC. Dugang pa, usa ka makapadasig nga mensahe sa pagtoo ang gipaambit ni Pastora Nenita Dizon, samtang si Assistant Provincial Warden Prospero Baco mipahigayon sa panapos nga pulong.
Gipadayag usab ang pasalamat sa mga misuporta sa kalihokan, diin gipasidunggan sila Dr. Ma. Cristina Jimena, Dr. Custodio Caezar B. Nambong, ug mga representante sa Seventh-Day Adventist, Couples for Christ, Church of God Mission, ug pipila ka opisina sa kapitolyo sama sa PADO ug PBO.
Ang Women's Month Celebration sa DPRC usa ka pagpamatuod nga bisan pa sa ilang kahimtang, ang PDL adunay higayon nga mopadayag sa ilang talento ug magpadayon sa ilang panaw sa kabag-ohan.
Writer: Lorna Tripoli
