Midagsa ang liboan ka mga Samaleño aron modawat sa ayuda ug serbisyo nga gitunol ni Governor Edwin “Kuya Gov” Jubahib sa upat ka mga barangay sa Island Garden City of Samal niadtong Nobyembre 11-12, 2024, pinaagi sa nagpadayong Oplan KKK (Kaagapay sa Kalinaw ug Kalamboan) nga gipahitabo sa Barangay Balet, Barangay Mambago B, Barangay Limao, ug Barangay Cawag sa maong siyudad.
Sa mensahe ni Kuya Gov, nagkanayon kini nga siya maningkamot aron magpadayon ug mapalapdan pa ang pagtunol sa ayuda ug ang paghatag sa mga gikinahanglang serbisyo sa publiko. Laraw karon sa gobernador nga mabutangan og mga solar streetlight ang mga kadalanan sa isla ug ang pagtukod og water treatment facility. Dugang ni Kuya Gov nga kung mahatagan siya og laing termino isip gobernador, mogahin siya’g ₱10 milyon pondo kada tuig alang sa mga barangay.
“Unsa pay plano nato gawas sa tulay, kuryente, unsa pa? Dapat magkaroon og solar streetlight ang tanang area sa Island Garden City of Samal para pag-agi ninyo sa inyong mga kalsada, gawas nga atong palapdan, hayag ang inyong pagbiyahe… Dapat mag-establish ta’g water treatment facility. Kinahanglan nga ang tanang mga human waste dili pwede modiretso sa dagat,” sulti ni Kuya Gov.
Kalakip sa mga serbisyo nga gidala sa probinsyal nga panggamhanan mao ang mga mosunod: libreng tambal, medical and dental examination, social services, tambag legal, agriculture and veterinary services, eye care screening, HIV screening, x-ray, libreng gupit, livelihood training, pagpanghatag og bugas, tsinelas, mga abono ug semilya sa mga gulay ug prutas, libreng bakuna, purga, ug multivitamins alang sa mga kahayopan, ug daghan pang uban.
Kauban ni Kuya Gov sa maong aktibidad ang mga pangulo sa departamento sa kapitolyo, anaa sab ang presensiya nila Mayor Al David Uy, Mayor Tata Romano, Engr. Josie Jean Rabanoz, Former Mayor Erning Evangelista, Atty. Jigs Relampagos, ug Clarice Jubahib.
Ang Oplan KKK usa ka inisyatibo sa probinsya sa Davao del Norte nga nagtinguha nga mapaduol ang mga programa ug serbisyo sa gobyerno ngadto sa katawhan, labi na sa mga lagyong lugar sa probinsya. Pinaagi niini, gilauman nga mas mapalambo ang kalidad sa kinabuhi sa mga residente pinaagi sa mga proyekto ug serbisyo nga makabenepisyo direkta sa ilang komunidad.
Writer: Nestor Mata, Jr.
