Gisaulog sa Probinsya sa Davao del Norte ang ika-35 National Statistics Month niadtong Oktubre 1, pinaagi sa usa ka motorcade ug usa ka seremonyas nga gipahigayon sa Pavilion, Provincial Capitol, Mankilam, Tagum City. Ang tema sa selebrasyon mao ang "Advancing Data and Statistics through Digital Transformation: A Road to an Empowered Nation."
Sa maong aktibidad, ang Philippine Statistics Authority (PSA) – Provincial Statistical Office – Davao del Norte, niapod-apod og mga tokens isip pahalipay sa mga partisipante nga sakto nakatubag sa mga trivia questions.
Usa sa mga gipang-highlight atol sa selebrasyon mao ang opisyal nga paglunsad sa Socio-Economic Profiling System (SEPS) Online. Kini usa ka inisyatibo aron mapalambo ang kooperasyon tali sa mga local government units (LGUs), mga ahensya sa gobyerno, ug uban pang mga institusyon. Tumong sa SEPS Online nga mapasayon ang mga serbisyo ug mas madasig nga pagtunol niini sa publiko.
Si Acting PPDC Engr. Maria Hazel Zafra, ug kasamtangang Chairperson sa Provincial Statistics Committee - Davao del Norte, mipadayag sa kamahinungdanon sa mga datus nga gipagawas sa PSA, ilabi na sa pagpahigayon og epektibong mga programa ug proyekto sa probinsya.
"Ato ni gipakusgan tungod kay kahibalo ta nga importante kaayo ang statistics sa policy making ug strategic planning. Kung walay datus, lisod maghimo og plano,"matud ni Zafra.
Dugang pa, butyag ni Engr. Zafra sa PTV DavNor News Team nga ang National Statistics Month mao ang pag-ila sa dakong kontribusyon sa PSA sa pagpalambo sa mga komunidad.
"Angay gyud nga i-celebrate kini nga bulan bisan dili kaayo popular, kay importante kaayo ang statistics sa pagpauswag sa atong mga komunidad ug sa tibuok probinsya,"dugang ni Zafra.
Samtang, si PSA Statistical Specialist Michelle Maningo, nagpasalamat sa Provincial Government ubos sa pagdumala ni Governor Edwin Jubahib, ug sa suporta sa PPDO, ug mga private stakeholders nga nahimong posible ang ilang mga katikaran.
"For Davao del Norte, gusto sa PSA nga mas mapaabot pa sa mas daghang katawhan ang among mga produkto ug serbisyo, ilabi na ang poverty statistics,"pasabot ni Maningo.
Writer: Lorna Tripoli
