Aron mapalambo ang kalidad sa serbisyo sa hospitality sector, ang Probinsyal nga Panggamhanan sa Davao del Norte, pinaagi sa Provincial Tourism Office, naglunsad og libreng housekeeping training nga gisalmutan sa 20 ka mga empleyado gikan sa lain-laing mga hotel ug accommodation facilities gikan sa Siyudad sa Tagum, Siyudad sa Panabo, ug Lungsod sa Sto. Tomas. Ang maong kalihokan gipahigayon sa Bulwagan ng Karunungan, Government Center, Mankilam, Tagum City, sugod karong adlawa, Septyembre 11, 2024, ug magpadayon hangtod Septyembre 13.
Si Noel Daquioag, ang Provincial Tourism Officer, maoy nagdumala sa kalihokan ug sa iyang mensahe, iyang giila ang importansya sa pagpalambo sa kalidad sa kalimpyo ug serbisyo sa industriya sa hospitality aron makadani pa og daghang turista ug mapasaka ang ekonomiya sa probinsya.
Si Benjamin Singson, usa ka iladong housekeeping facilitator gikan sa kaulohang Manila, giimbitahan aron ipaambit ang iyang kaalam sa maong sektor. Sa iyang sesyon, gidetalye ni Singson ang nag-unang katuyoan sa housekeeping, nga naglakip sa pagmentinar sa kalimpyo, kaluwasan, ug kaharuhay sa mga accommodation facilities. Iya usab nga gipaambit ang mga pinakamaayong pamaagi ug bag-ong trend sa hotel management.
Ang tulo ka adlaw nga training magtuki sa nagkalain-laing topiko, gikan sa mga basic nga teknik sa housekeeping hangtod sa advanced skills sa hotel operations, uban ang tumong nga palig-onon ang abilidad sa mga lokal nga trabahante aron makahatag og world-class nga serbisyo. Kini nga inisyatiba kabahin sa mas halapad nga plano sa provincial government nga suportahan ang sektor sa turismo ug mapaabot ang ka-competitive sa mga lokal nga negosyo.
Ang mga partisipante nagpahayag sa ilang kadasig nga magamit ang ilang bag-ong natun-an sa ilang mga tagsa-tagsa ka trabahoan.
Kini nga kalihokan usa lamang ka pamaagi sa daghang mga inisyatiba sa Probinsyal nga Panggamhanan ubos sa pagdumala ni Governor Edwin “Kuya Gov” Jubahib aron mapalambo ang malahutayong turismo sa probinsya.
Writer: Nestor Mata, Jr.
