Aron mapalambo ang kahibalo ug kaandam sa mga empleyado bahin sa kalamidad ug mapasantop ang ilang responsibilidad sa kinaiyahan, gipahigayon sa Probinsyal nga Panggamhanan sa Davao del Norte ang Employees Disaster Prevention and Environmental Awareness Day sa DavNor Gym, Mankilam, Tagum City, niadtong Septyembre 24, 2024. Kapin usa ka gatos ka empleyado sa kapitolyo ang nitambong sa maong kalihokan.
Sa iyang mensahe, gihulagway ni Provincial Administrator Engr. Josie Jean Rabanoz ang kaimportante sa mga proaktibong lakang sa paglikay sa kalamidad. Iyang gihatagan og gibug-aton ang dakong papel sa mga empleyado sa pagsiguro sa kaluwasan sa ilang gitrabahoan dungan sa pagpahinumdom nga sila kinahanglan mahimong responsable nga mga lungsoranon alang sa kinaiyahan.
“Tama ra gyud nga naa tay training pagahimoon sa atoang mga empleyado. “This is just the start sama sa giingon ni Edwin, naningkamot ang atong HR through kang Kuya Gov kay gusto ni Kuya Gov i-equip ang atoang mga empleyado para tanan ready ug andam nga motabang kay wala ta kabalo sa panahon kung kanus-a moabot ang kalamidad,” matud ni Rabanoz.
Mipaabot sab sa iyang suporta si Governor Edwin Jubahib pinaagi sa iyang Private Secretary Gerry Cosal, ug gipasidunggan ang mga empleyado sa ilang aktibong partisipasyon.“I commend the PENRO and PDRRMO for their relentless dedication and hardwork in organizing this event. Your commitment in raising awareness and building the capacity of our workforce is truly commendable. I also extend my gratitude to all the participants for your eagerness to learn and be part of the solution,”sulti ni Cosal.
Subay sa maong kalihokan adunay mga pagbansay sama sa basic life support, nagkadaiyang paagi sa paghikot sa pisi o knot tying, ug vehicular crash extrication. Kini makatabang sa mga empleyado nga epektibong motubag sa mga emerhensiya, sa trabaho man o sa ilang personal nga kinabuhi.
Gipahigayon usab ang Basuresiklo Program 2024 Capitol Employee Edition diin gidasig ang mga empleyado nga magdala og empty PET bottles. Depende sa gibug-aton, ang ilang nadala nga plastic recyclables mahimong kambyohan og lain-laing premyo sama sa duha ka kilong bugas, customized tote bags, mugs, bamboo pens, key chains, ug sticky notes. Ang programa nagpalig-on sa kaimportante sa pagpakunhod sa plastik nga basura ug sa pag-promote sa malungtarong mga praktis sulod sa Kapitolyo.
Ang Employees Disaster Prevention and Environmental Awareness Day karong tuiga wala lang nagtudlo sa mga empleyado sa mga kinahanglanong abilidad sa pag-atubang sa kalamidad, apan nagpalambo usab sa kultura sa responsableng pag-atiman sa kinaiyahan. Kini nagsiguro sa mas luwas ug malungtarong kaugmaon alang sa probinsya.
Writer: Nestor Mata, Jr.
