Gipasidunggan sa Provincial Disaster Risk Reduction and Management Office (PDRRMO) ang mga nagkadaiyang ahensya sa gobyerno, non-government organizations, AFP, PNP, Provincial Coast Guard, City/Municipality Disaster Risk Reduction and Management Offices, ug uban pang institusyon sa ilang kooperasyon sa Probinsyal nga Panggamhanan sa Davao del Norte panahon sa kalamidad.
Sa panapos nga aktibidad sa National Disaster Resilience Month niadtong Hulyo 31, 2024, sa VIP Clubhouse, DNSTC, Mankilam, Tagum City, gitunol ang mga plaque ug sertipikasyon sa mga nagkadaiyang ahensya nga aktibong nisuporta. Mga premyong salapi usab ang gihatag ngadto sa mga midaog sa mga pakontes sama sa poster making, ug Recycle, Upcycle, and Repurpose contest nga gidumala sa PDRMMO.
Sa poster making contest, si Joe Neil Paragoso gikan sa Provincial Engineer's Office maoy palarang nidaog sa 1st place, samtang si Helixanne Cabatuan sa Provincial Planning and Development Office alang sa 2nd place, ug Juvy Garillos gikan sa Provincial Economic Enterprise Development Office ang nakakuha sa 3rd place. Ang CDRRMO Panabo City maoy nakabitbit sa unang ganti alang sa Recycle, Upcycle, and Repurpose.
Gipasalamatan ni Governor Edwin "Kuya Gov" Jubahib ang tanan nga nagsilbing katambayayong sa probinsya sa panahon sa kalamidad. Sa iyang mensahe nga gipaabot sa iyang representante, gibatbat niini ang kaimportante sa ispiritu sa panaghiusa ug kooperasyon.
"I would like to express my gratitude to all our partner agencies for the tireless dedication and wavering support in promoting disaster resilience across our province," matud ni Melmida.
Mapasalamaton usab si Glenda Delideli, ang PDRRMO Head, sa iyang mga kaubanan sa departamento sa 24/7 niining pagserbisyo panahon sa kalamidad labi na sa operations and division warning, admin training, research and planning division, ug lakip iyang gipasalamatan ang mga volunteers, responders, men in uniform, ug uban pang nisuporta.
"Ang importante, naa ta kanunay andam motabang sa unsa man nga challenges and also naa pud ta karon sa pag-celebrate sa atoang mga accomplishments," sulti ni Delideli.
Writer: Lorna Tripoli
