Nisugwak ang liboan ka katawhan sa DavNor Gym aron modawat sa mga benepisyo ug serbisyo atol sa pagselebrar sa adlaw nga natawhan ni Presidente Ferdinand “Bongbong” Marcos Jr., kaniadtong Septyembre 13, 2024. Ang kalihokan, ubos sa tema "Handog ng Pangulo, Serbisyong Sapat para sa Lahat,” giorganisa sa probinsyal nga panggamhanan, pinangulohan ni Governor Edwin I. Jubahib, isip pagduyog sa probinsya sa kalihokan sa tibuok nasud.
Kapin sa 2,100 ka benepisyaryo sa TUPAD program sa DOLE ug 900 ka benepisyaryo sa TESDA ang nidawat og ₱4,620 matag usa nga beripikadong miyembro. Giduyogan kini og mga serbisyong panglawas sama sa libreng medisina, ibot sa ngipon, manicure, pedicure, massage, tambag-legal, ug mga baratong baligyang produktong pang-agrikultura sa Kadiwa ng Pangulo sama sa NFA rice nga gitanyag sa kantidad ₱21 matag kilo.
Ang mga barangay sa Taba, Carmen, ug Magugpo Poblacion, Tagum City, nakadawat og ₱500,000 gikan sa DOLE Integrated Livelihood Program. Dugang pa, pipila ka mga indibidwal ang nidawat og ₱30,000 alang sa sari-sari store ug rice retailing, samtang ang uban, mga benepisyaryo sa DOLE Internship Progam. Ang TESDA nagtunol og scholarship ug training support fund nga mokabat sa ₱7 milyon ug dunay lima ka kwalipikadong benepisyaryo usab ang gihatagan og toolkits. Ang PSWDO nitunol sab og assistive device sa mga persons with disability (PWD).
Sa mensahe ni Gov. Jubahib, gibida niya ang Oplan KKK (Kaagapay sa Kalinaw ug Kalamboan), nga nagpadayon sa paghatag og serbisyo aron makatabang sa mga nagkalisud nga katawhan.
"Ang mga adhikain ng provincial government ay kaisa sa mga hangarin ng administrasyon ni Pangulong Bongbong Marcos Jr. Sama-sama nating isulong ang mas maliwanag na kinabukasan para sa bawat Pilipino,” matud sa gobernador.
Anaa mismo sa maong okasyon si Secretary Eduardo M. Año, ang National Secretary Adviser ug representante ni PBBM, diin iyang gipasalamatan ang tanang local government units (LGUs) sa ilang kooperasyon nga nagpabiling insurgency-free ang Davao del Norte.
"Subalit ngayon, insurgency-free na po ang buong rehiyon at kitang-kita naman na tuloy-tuloy na ang pag-unlad sa inyong lugar. Maraming, maraming salamat po sa inyong pagkakaisa sa adhikaing ito ng pamahalaan at sana ay mapanatili natin ito para sa mga susunod na henerasyon. Nais kong kilalanin ang ambag ng ating local government executives at local government units, palakpakan po natin ito, lalong lalo na sa pangunguna sa mahal na gobernador, Governor Edwin Jubahib," ingon ni Sec. Año.
Nitambong sab sa kalihokan ang National Task Force to End Local Communist Armed Conflict Executive Director USec. MGen. Ernesto Torres Jr., ug DILG Regional Director Abdullah Matalam.
Writer: Lorna Tripoli
