Klase-klaseng grupo ug asosasyon sa mga darters sa tibuok Pilipinas ang midayo sa Tagum City alang sa ika-upat nga National Dart Tournament, nga giorganisa sa Tagum Optimate Darters Organization (TODO).

Opisyal kining giabrihan sa milabayng Hulyo 28 ug giila isip kinaunhan nga dart tournament subay sa pagselebrar sa 57th Araw ng Davao del Norte ug Kadagayaan Festival.

“Ano ni siya, National Darts Tournament. So, every year ang Tagum City gipaningkamotan namo sa amoang organization nga maka-host mi at least twice a year og national event diria sa Tagum City. So far this year, karon, first pa ni siya padula karon nga year,” ingon ni Ruvi Nueva, ang organizer sa Tagum Optimate Darters Organization (TODO).

Ang maong torneyo adunay pito ka category, ang Classified Draw Doubles, Fixed Four Person Team, Classified Draw Triples, Youth Singles, Non-Classified Golden Singles (50 yrs old and above), Ladies Singles, ug Open Singles.  

Usa sa mga partisipante si Regie nga taga-Panabo City.

“Since 2019, so almost five years na ko nagadula aning darts. Giswerte pud gamay niagi pud ko og champion then sa national darts, na-top 4...Kani nga event man gud kay nindut siya nga event in terms of focus then kung naa kay mga bother sa imong hunahuna, maglisud ka’g igo sa target nimo. So, mao na ang nakanindut sa darts. Then, unite ang mga players. Wala gyud ko naka-experience nga nag-away,” sulti ni Regie Relampagos, darter gikan sa Panabo Dart Shooters-Team Gusali Verde.

Samtang, plano sa TODO nga magtukod og dart clinic alang sa mga interesado makatuon sa sports nga darts dinhi sa probinsya.

“After this event, ang organization is nagplano nga mapa-dart clinic na mi. So, open ni sa tanan nga gusto makatuon sa sports nga darts. Ang uban man gud is nahibal-an lang na darts is kanang mag-inom-inom. Pero mostly kung makasabot gyud sila kung unsa ang sports nga darts, diha gyud nila ma-appreciate,” matud ni Nueva.

Writer: Caren De Vera