Niduyog ang Probinsyal nga Panggamhanan sa Davao del Norte sa ika-27 nga anibersaryo sa pagkahimong siyudad sa Tagum niadtong Marso 7, 2025. Dasig nga niapil sa “Parada sa Bayan”, taliwala sa init nga panahon, ang mga trabahante gikan sa nagkadaiyang departamento sa kapitolyo ubos sa pagdumala ni Governor Edwin I. Jubahib.

Duyog sa nasampit nga kalihokan ang taga-Provincial Governor's Office, Provincial Information, Communication, and Knowledge Management Office, Davao del Norte Field Offices sa Rehiyon XI sama sa Department of Social Welfare and Development, Department of Agriculture, National Food Authority, ug uban pang nasudnong ahensya.

Nanguna sa parada ang mga empleyado sa lokal nga panggamhanan sa siyudad, mga estudyante, magtutudlo gikan sa pribado ug pampublikong tulunghaan, non-government organizations, negosyante, mga street vendors. Apil usab ang 23 ka barangay nga nagpakita sa ilang garbong mga float nga naghulagway sa ilang produkto ug atraksyon. Sakay sa mga float ang mga kandidata sa Binibining Tagum 2025.

Nagsugod ang parada nagsugod sa kanto Briz, nisubay sa National Highway sa dalang Apokon, ug nisangko sa JV Ayala Avenue sa Tagum City Hall. Naghatag og dugang kahinam sa selebrasyon ang Musika Marching Band ug Kasikas sa Dalan Drum and Bugle Lyre Corps (DBLC) Competition nga gipartisiparan sa nagkadaiyang eskwelahan.

Ilawom sa kainit sa panahon, gipakita sa mga Tagumeño ang kadasig ug panaghiusa, nga nagpamatuod sa ilang walay puas nga suporta sa padayong kalamboan sa siyudad sulod sa sobra duha ka dekadang katuigan.

Writer: Lorna Tripoli