Aron masiguro ang hustong timbang ug kalidad sa mga paninda, ginahimo matag adlaw ang joint monitoring sa market inspectors ug Civil Security Unit (CSU) sa merkado publiko sa Tagum City. Kini ang giklaro ni City Economic Enterprises Manager Pocholo Melendres atol sa pakighinabi sa PTV DavNor News Team kaniadtong Enero 23, 2025.

Tulo ka mga "timbangan ng bayan" ang gibutang sa palengke—sa entrada, tunga, ug paggawas sa fish ug meat sections. Kini aron masiguro nga sakto ang timbang sa napalit sa mga konsumidor. Dugang pa, ang mga CSU nagalibot matag karon ug unya alang sa pagmentinar sa kahapsay ug kalinaw sa palengke.

Giawhag ni Melendres ang publiko nga kun adunay reklamo bahin sa paninda, direkta kining ipaabot sa iyang buhatan aron dali kini maaksiyonan. Gipahinumdoman usab niya ang katawhan nga dili lamang kutob sa pagpost sa social media kung adunay mga mulo, kay ang dili tukmang reklamo nga walay igong kapasikaran, makadaut sa kredibilidad ug imahe sa merkado publiko.

"Kung duna moy pagduda sa inyong mga gipalit, be it sa quality or sa timbang, ayaw dayon mo og uli, ireklamo gilayon diri sa amoa... Unta dili lang kutob sa social media. Walay problema mopagawas og hinaing ninyo sa social media. Pero unta apilon ninyo diria saka sa amoa para mareklamo gyud ninyo ug atoa ma-aksyonan kay dili man tanan tikasan ang inyohang ginaingon,"ingon ni Melendres.

Ang padayon nga pagmonitor ug aktibong pag-aksyon sa mga reklamo usa ka pamatuod sa dedikasyon sa siyudad sa pagserbisyo ug pagprotekta sa mga konsumidor sa Tagum City.

Writer: Lorna Tripoli