Kapin sa 600 ka estudyante sa Davao del Norte ang nakapahimulos sa Career Path Development Support and Orientation nga gipahigayon niadtong Marso 26, 2025, sa Davao del Norte Coliseum. Ang maong programa nagtumong sa paggiya sa mga kabatan-onan sa pagpili sa husto nga career path pinaagi sa impormasyon kabahin sa mga in-demand nga trabaho ug mga lisud pangitaon nga posisyon.
Gipasiugdahan sa Provincial Administrator’s Office – Employment and Workforce Development Division (PADO-EWDD) ubos sa panguna ni Gloria Excelsa S. Pamugas ug Marites Racacho, ang kalihokan naglakip sa career guidance ug educational financial assistance. Sa maong programa, matag estudyante nga sakop sa Provincial Scholarship Program nakadawat og ₱6,000 nga tabang pinansyal alang sa ilang edukasyon.
Matud ni Pamugas, ang maong inisyatibo nagtinguha sa padayon nga pagsuporta sa mga iskolar pinaagi sa regular nga pagpagula sa ilang educational assistance matag semester.
“Ang among tumong mao ang paghatag og giya sa atong mga provincial scholars ug pagpadayon sa atong paningkamot sa pagsuporta sa ilang edukasyon. Ang ₱6,000 nga ilang nadawat matag semester makatabang sa ilang panginahanglan isip mga estudyante,” ingon niya.
Usa sa mga iskolar, si Arzen Gil Panangcad, mipahayag sa iyang dakong pasalamat sa programa, ilabi na sa dakong tabang niini alang sa mga estudyanteng adunay limitadong pinansyal.
“Dako kaayo akong pasalamat kay Kuya Gov sa iyang programa. Kung wala kini, dili ko makatabang sa akong kaugalingon. Importante kaayo kini sa akoa isip estudyante nga nagkinahanglan og suporta,” matud ni Arzen.
Samtang si Lorican Cabatuan, laing benepisyaryo, mipasabot nga ang nakuha niyang pinansyal nga suporta magamit aron mas mapadali ang iyang pagpangandam alang sa maayong kaugmaon.
“Grateful kaayo ko sa oportunidad nga gihatag kanamo. Kini usa ka tulay padulong sa among mga damgo, ug dili namo kini usikan,” sulti ni Cabatuan.
Pinaagi sa Career Path Development Support and Orientation, naghatag og mas lig-on nga direksyon alang sa mga estudyante ang probinsyal nga panggamhanan, aron sila andam sa mga hagit sa umaabot ug adunay igong kahibalo sa ilang propesyonal nga dalan.
Writer: Jeah Hermoso and Aracel AbajaPhotos: Michael Sanchez
