Nagpahigayon og benchmarking ang Provincial Local Government Unit (PLGU) sa South Cotabato sa probinsya sa Davao del Norte aron makat-onan ang mga best practices niini sa e-governance, partikular na sa paggamit sa electronic signature ug procurement process, nga makatabang sa ilang Human Resource Management System (HRMS).
Gipangunahan ni Acting Provincial Administrator Atty. Renette Bergado ug Provincial HRM Officer Freda Liza Gazo ang 83 ka delegasyon gikan sa South Cotabato nga naglaum nga mapalambo ang ilang HR system pinaagi sa mga pagtulun-an sa Davao del Norte.
Gitutokan sa diskusyon ang Human Resource Information System (HRIS) sa Davao del Norte nga naghatag og online access sa mga empleyado sa ilang personal nga impormasyon, leave applications, ug uban pang HR-related transactions. Si Provincial Human Resource Management Officer Edwin Palero ang nangulo sa presentasyon ug kolaborasyon tali sa duha ka PLGU aron mas mapalapad pa ang ilang mga HR systems gamit ang Information Technology.
"Kami, from South Cotabato, nag-adto diri sa Davao del Norte para mag-benchmark sa inyong different e-governance digitalization sa SPMS specifically kay gusto pud namo nga makita ang best practices, specially sa Human Resource nga mga programa ug sa inyong performance management system," sumala ni Atty. Bergado.
Mapasalamaton si Atty. Bergado kang Governor Edwin I. Jubahib alang sa mainitong pagdawat ug naglaum siya nga magpadayon ang kooperasyon sa umalabot pinaagi sa memorandum of agreement, aron mas masangkapan pa ang ilang technical staff sa mga epektibong sistema.
"Kay Governor Jubahib salamat kaayo Gov sa pagdawat sa amoa diri very warm gyud ang welcome diri sa inyohang kapitolyo. And we are very happy sa tanang learning nga nakuha namo diri hoping nga dili lang diri mahuman and we are hoping nga magkaroon tayo ng memorandum of agreement para sa sunod, ang amoang technical staff na lang ang magbalik-balik, ang mangutana, ug mas daghan pang learning ang amoang makuha namo. Salamat kaayo. Sa ngalan sa amoang Governor Reynaldo Tamayo Jr, from the Province of South Cotabato, thank you very much," dugang niya.
Ang aktibidad gipahigayon sa Bulwagan ng Karunungan, Capitol Compound sa Tagum City, Nobyembre 7, 2024.
Writer: Lorna Tripoli