Giila ni Governor Edwin "Kuya Gov" Jubahib ang 344 ka mga trabahante sa Provincial Capitol pinaagi sa Gantimpala Agad Award, isip pasidungog sa ilang dedikasyon ug kontribusyon sa serbisyo publiko. Gihatagan sila og sertipiko nga pinermahan mismo sa gobernador ug gasa nga simbolo sa pasalamat.

Ang mga awardee gipasidunggan sa ilang papel sa kalamboan sa probinsyal nga panggamhanan.

Sila naggikan sa Provincial Disaster Risk Reduction Management Office (PDRRMO), Provincial Engineer's Office, Provincial Administrator's Office, Provincial Health Office, PICKMO, Davao del Norte Provincial Rehabilitation Center, ug uban pa. Alang kini sa implementasyon sa Oplan Kaagapay sa Kalinaw ug Kalamboan, DavNor Icon 2024, Bagong Pilipinas Serbisyo Fair, ug mga rescue operation sa ninglabay'ng kalamidad dala sa shearline ug trough sa low pressure area sa mga ninglabay'ng mga bulan.

Gihangyo ni PHRMO Head Edwin Palero ang mga empleyado nga bisan unsa pa ang estado sa employment, plantilla, job-order, casual o regular, magtinabangay kini sa pagtunol sa serbisyo sa katawhan.

"Pareho ra ta tanan. Regardless kung unsa ang atong status of employment, pareho ra gyud ta empleyado sa kapitolyo. Ang atong sweldo gikan sa kaban sa gobyerno ug mao nang motrabaho ta," sulti ni Palero.

Iyang gipasalamatan ang mga awardees sa ilang kakugi ug dedikasyon sa pagpanarbaho nga gipaambit sa kauswagan sa probinsya.

"Nagpasalamat mi, ako as HR management, inyong mga department heads, ang atoang mga opisyales, elected officials, ug si Kuya Gov kay sa inyong pagpaningkamot nga niabot gyud sa punto nga makadawat mo og awards ug token," dugang niya.

Ang seremonya nga gidumala sa Provincial Human Resource Management Office, gipahigayon sa DavNor Pavilion, Mankilam, Tagum City, Disyembre 4, 2024.

Writer: Lorna Tripoli