Hustisya ang gisyagit ni Governor Edwin "Kuya Gov" Jubahib sa iyang pagbatbat sa mga di-makatarunganong buhat sa ubang politiko nga pagkaltas sa mga ayuda nga dapat maadto sa katawhan.
Sa iyang pagsugat sa mga residente nga mipahimulos sa libre nga serbisyo dalit sa Oplan KKK (Kaagapay sa Kalinaw ug Kalamboan) sa Brgy. San Vicente, Sto. Tomas, miingon si Kuya Gov nga dako ang iyang kasakit sa iyang pagkabalo nga adunay mga politiko nga mikaltas sa mga pinansyal nga hinabang nga dapat maabot sa kamot sa katawhan.
Sulti niya, dako unta kini og tabang alang sa mga kabus ug nanginahanglan nga pamilya, apan nagamit lamang kini sa pagpangurakot sa ubang politiko.
Gusto ni Kuya Gov nga manubag ang mga nalambigit nga politiko sa maong buluhaton. Kini ang rason kung nganong naningkamot siya sa pag sang-at sa maong kaso sa Senado niadtong Enero sa kasamtangang tuig.
Kauban ang iyang mga umalabot nga kaagapay sa pagpanerbisyo sa iyang sunod nga termino, giduso ni Kuya Gov ang limpyo ug maayo nga pagdumala sa probinsya. Tambag ni Kuya Gov sa katawhan, dili na magpatunto ug ireport dayon sa iya kung aduna pa’y mahitabo nga sama niini.
Ang Brgy. San Vicente mao na ang ikaupat nga barangay nga naserbisyohan sa Oplan KKK sa munisipyo sa Santo Tomas. Tulo pa ka barangay ang suroyon sa maong programa alang sa bulan sa Oktubre.
Writer: Hannah Zafra
