Liboan ka mga residente sa Tagum City nakadawat og pinansyal nga hinabang gikan sa Probinsyal nga Panggamhanan sa Davao del Norte atol sa pagselebrar sa ika-67 nga adlawng natawhan ni Pangulong Ferdinand Marcos, Jr., Septyembre 11, 2024.
Ang distribusyon nga gipahigayon sa DavNor Gym, Mankilam, ubos sa pagdumala ni Governor Edwin I. Jubahib, naghatag og ₱2,000 alang sa 1,983 ka mga benepisyaryo pinaagi sa Ayuda para sa Kapos ang Kita Program (AKAP) sa pakigtambayayong sa DSWD ug PSWDO.
Gipasalamatan ni Gov. Jubahib si Pangulong Marcos Jr., ug mga senador sama nila ni Bong Go, Francis Tolentino, ug Loren Legarda, sa suporta alang sa probinsya. Ang gobernador nanaad nga padayon siyang mangita og pondo alang sa dugang ayuda sa katawhan.
"Ang kantidad ₱2,000 nga inyong gidawat maoy inyong permahan. Ngano man? Para sa sunod, maka-avail pa mo og laing tabang gikan sa national, provincial, ug local government. So, human ani mangita na pud ta og laing pondo aron makadawat na pud mo’g balik," matud ni Jubahib.
Si PSWDO Head Rosalinda Rapista nagsulti nga ang mga nidawat sa AKAP anaa gayud sa ubos nga kita matag bulan.
"Kini sila, mao kini mga pamilya nga ilang mga trabaho mga vendors, mga farmers, laborers nga nahisakop sa DSWD, kining AKAP. So, makadawat sila’g ₱2,000 karong adlawa. Para kini sa ilang augmentation sa ilang income within the month," sumala ni Rapista.
Sa pikas bahin, kinasingkasing usab nga nagpasalamat ang usa ka vendor nga siya nahiapil sa AKAP pay-out.
"Dako kaayo ko’g pasalamat sa AKAP labi na kay Kuya Gov. Jubahib. Dako kaayo’g tabang namo kay dugang kapital nako sa akong baligya ug kinahanglanon sa akong mga anak sa eskwelahan," ingon ni Mrs. May Flor Mahilum, usa ka vendor.
Ang nasampit nga pay-out kabahin sa selebrasyon sa adlawng natawhan ni PBBM karong Biyernes, Septyembre 13.
Samtang gipangunahan ni Provincial Administrator Engr. Josie Jean Rabanoz ang pagdalit og birthday song alang kang PBBM, uban nila Board Member Prospero Estabillo Jr, BM Frank Remitar, mga miyembro sa konseho sa Tagum sa pagpanguna ni Vice Mayor Allan Rellon, ug Jean Maliwanag sa Nicolasa Diaz Alvarez Foundation.
Writer: Lorna Tripoli
