Sa pagsugod sa tuig 2025, mas gipakusgan sa Bureau of Internal Revenue (BIR) ang kampanya alang sa tukma ug hustong pagbayad sa buhis pinaagi sa usa ka motorcade nga gihimo sa BIR Revenue District Office (RDO) 112 niadtong Abril. Ang kalihokan gisalmotan sa mga kawani sa BIR, pipila ka mga taxpayers, mga representante sa pribadong sektor, ug ubang ahensya sa gobyerno.
Ang motorcade nilibot sa nag-unang kadalanan sa siyudad sa Tagum, aron sa pagpahimangno sa publiko kabahin sa deadline sa annual income tax return (ITR) filing nga karon nang Abril 15. Gibutyag sa BIR nga ang mga molapas sa maong petsa posibleng makabayad og penalties. Human sa motorcade, gisundan kini sa usa ka press conference nga nagtumong sa pagpahibalo sa Income Tax Filing Campaign 2025.
Gipahayag ni Revenue District Officer Joseph Melchor Eballa nga ilang gipalig-on ang kampanya pinaagi sa rekorida sa nagkalain-laing munisipalidad aron mapadangat sa mga tawo ang kamahinungdanon sa pagbayad sa buhis. “Kini amoang tinguha nga mapaabot namo ang kasayoran sa mga tax payers sa deadline sa filing season,” matud ni Eballa, nga miila sa papel sa impormasyon aron malikayan ang late filings.
Sa maong presscon, gipasabot usab ni BIR OIC Regional Director Narciso Laguerta ang ilang mga inisyatibo alang sa mas episyente nga serbisyo gamit ang teknolohiya. Ilang gipasiugda ang paggamit sa online platforms alang sa tax payment pinaagi sa BIR eLounge facility nga available na sa matag revenue district office.
Gipaila usab ni Laguerta ang Electronic Systems Implementation Program (ESIP) nga kabahin sa mas halapad nga Digital Transformation Roadmap sa BIR. Ang maong roadmap nagtumong sa modernisasyon sa tax processes aron mas madali ug komportable ang serbisyo alang sa publiko. Usa sa mga gipaabot nga resulta niini mao ang pag-cover sa mga bag-ong klase sa income earners, lakip ang mga vloggers, content creators, ug online sellers.
“Ginamonitor na nato karon ang mga bloggers, online sellers, ug mga content creators aron maseguro nga makabayad sila sa hustong buhis,” pamahayag ni Laguerta. Iyang giduso ang mas lapad nga paggamit sa online system alang sa dali, hapsay, ug transparent nga tax filing ug payment. “We continue to enhance our systems to make the tax filing more convenient and efficient,” dugang pa niya.
Ang press conference gitambongan usab sa mga lider sa pribadong sektor ug bangko, sama nila Gilda Savellano sa PICPA Davao del Norte, Maria Elizabeth Tejano sa Land Bank Tagum Capitol, Nenita Malbas sa PICPA Davao del Norte, ug Arlene Singco sa BIR RDO 112. Apil usab ang mga media practitioners ug mga city ug municipal information officers sa rehiyon.
Pinaagi sa mga kalihokan sama sa motorcade, rekorida, ug press conference, padayon nga nagpaningkamot ang BIR sa pagpahimangno sa publiko nga ang tukmang pagbayad sa buhis dili lang usa ka obligasyon apan usa ka importanteng kontribusyon alang sa nasudnong kalamboan.
Writer: Lorna TripoliPhotos: Rovel Tabelon
