Ang giya sa pagsalbar og kinabuhi pinaagi sa cardiopulmonary resuscitation (CPR) ug ang saktong paggamit sa fire extinguisher panahon sa emerhensiya, pipila lamang sa mga lektura nga libreng ginatanyag sa Oplan KKK (Kaagapay sa Kalinaw ug Kalamboan) Serbisyo Caravan. Kini sa pagdumala sa Provincial Disaster Risk Reduction and Management Office (PDRRMO) nga nagsunod sa ilang mandato sa pagsalbar og kinabuhi panahon sa kalamidad, emerhensiya o aksidente.
Sa ika-siyam nga hugna sa Oplan KKK, sa Barangay Del Pilar, New Corella, niadtong Agosto 27, 2024, padayon ang paghatud sa probinsyal nga panggamhanan sa mga serbisyo sa katawhan sama sa libreng tambag-legal ug panlawas sama sa chest x-ray, ibot sa ngipon ug libreng medisina. Duna puy TUPAD profiling, libreng gupit, bugas-tulo ka kilo, school bags, tsinelas, mga seedlings sama sa durian nga puyat variety, organic fertilizer ug pesticides, bitamina ug bakuna alang sa mga kahayopan, ug uban pa.
Katambayayong sa PLGU ang nagkadaiyang government line agencies sama sa DOLE, NCIP, AFP, DNPPO, ug LGU New Corella.
Gipasabot ni Governor Edwin "Kuya Gov" I. Jubahib ang kamahinungdanon sa kalinaw ug ang pagpadayon sa kauswagan sa probinsya.
"Madisturbo ang inyong pamuyo, madisturbo ang inyong panginabuhi ug ang labaw sa tanan walay negosyante nga mohatag sa ilang pagsalig nga mo-invest sila diri sa atoang probinsya. So, maglisud ang katawhan sa pagpangita og katrabahoan, mao nang gi-priority gyud nato ang kalinaw," matud sa gobernador.
Samtang ang serbisyo nga walay pili maoy gipaniguro sa gobernador sa nagpadayong pag-arangkada sa Oplan KKK.
"Kung si Kuya Gov ang manghatag, tanan mahatagan walay pili, tanan tagaan. So, mao ni karon atong serbisyo walay pili," dugang niya.
Si Jennifer Tumamac, ang barangay konsehal sa Barangay Mesaoy mapasalamaton sa serbisyong hatud nila Gov Jubahib ug Congressman Pantaleon "Bebot" Alvarez sa mga baryohanon.
"Mapasalamaton kaayo mi’g dako sa programa ni Gov. Edwin ug kang Sir Bebot Alvarez, kay gikan sa bata, gikan sa pagpanganak hangtod sa pagkamatay sa tao, aduna gyud ang ilang suporta," matud ni Tumamac.
Samtang, nigahin og panahon ang gobernador sa pagpaminaw sa mga mulo ug mga panginahanglan sa mga opisyales sa barangay atol sa pulong-pulong. Ang mga opisyal sa lima ka baryo sa Del Pilar naghangyo alang sa dugang proyekto sama sa paghuman sa gitukod nga barangay hall sa Del Pilar, pagpasemento sa mga kadalanan, desilting, ug pagpalapad sa drainage canals, ug hose alang sa patubig.
Gisaad ni Gov Jubahib nga hinanaling aksyon ang iyang pagahimuon alang sa mga immediate nga panginahanglan. Giawhag sab niya nga ang tanang mga proyekto nga mokantidad og sobra₱500k kinahanglan ipaagi sa barangay resolution sa dili pa iduso sa governor’s office aron mahilakip sa 2025 Annual Investment Program sa probinsya.
Writer: Lorna Tripoli
