Giaprobahan sa Provincial Peace and Order Council (PPOC) ang Peace and Order and Public Safety (POPS) Plan 2026-2028 sa Probinsya sa Davao del Norte, aron sa pagpatunhay sa kalinaw, kahusay, ug kaluwasan sa katawhang Dabaonon.
Sa pagpanguna ni Provincial Administrator Atty. Ralph Dela Cruz isip Presiding Officer, giuyonan sa mga miyembro sa PPOC ang tulo ka tuig nga POPS Plan nga dunay proposed budget nga P1,683,090,000, atol sa Quarterly Meeting sa Council niadtong Hunyo 23, 2025.
Ang POPS Plan alang sa ika-tulo nga termino ni Governor Edwin “Kuya Gov” Jubahib, milangkob sa P928.5 million alang sa mga programa, proyekto, serbisyo ug aktibidad (PPSA) ilawom sa Peace and Order program ug P754.5 alang usab sa mga PPSA sa Public Safety component.
Ubos sa Peace and Order Program, ang mga PPSA sa Crime and Disorder – P242.4 million; Illegal Drugs – P62.4 million; Conflict – P315.74 million; ug, Threats to Environment and Human Security - P308 million. Samtang ilawom sa Public Safety Program ang Road and Vehicle Safety – P649.5 million ug Emergency Crisis Management and Fire Safety - P105 million.
Ang POPS Plan usa ka komprehensibo ug hiniusang aksyon sa Probinsyal nga Panggamhanan nga nagtumong aron santaon ang ilegal nga droga ug kriminalidad, wagtangon ang hulga sa pagbalik sa insurhensiya sa probinsya ug uban pang mga lakang alang sa pagkab-ot sa luwas, siguro, malinawon, ug progresibo nga komunidad sa mga Dabaonon.
Nagpadayon nga luwas sa kahadlok ang katawhan ug nagpabilin nga insurgency-free ang Davao del Norte, sanglit sumala sa report sa army wala nay natala nga aktibidad sa mga rebeldeng NPA sa probinsya sugod pa sa tuig 2022.
Matud sab sa taho sa PDEA, dunay tulo ka drug-free barangays ug 182 ka mga barangay ang gideklarang drug-cleared, samtang duna pay 38 ka mga barangay sa probinsya ang nagpabiling apektado sa problema sa droga.
Asoy ni Atty. Dela Cruz nga dakong tabang unya sa gipakusog nga anti-drug campaign ang gipapalit ni Kuya Gov nga mga drug-sniffing dogs, nga nailhan nga K-9 units, mga iro nga gibansay aron modetik sa presensiya sa ilegal na droga.
Writer: Noel Baguio
