Karong Oktubre 18, 2024, ipahigayon ang usa ka dakong kalihokan sa Sitio Kapatagan, Gupitan, Kapalong diin ang Provincial Government sa Davao del Norte uban ang DOST Mindanao maglunsad sa "Green Green Green Program" ug ang pagsulay alang sa Guinness World Record para sa pinakadaghang mga tawo dungang magtanom og kawayan.

Sumala ni Provincial Agriculturist Acting-Assistant PG Department Head Alphabet Gulanes nga gilaumang mokabat kapin sa 400 ka mga partisipante ang moapil sa maong kalihokan.

Kini nga inisyatibo adunay dakong tumong nga pagpausbaw sa environmental sustainability pinaagi sa pagtanom og kawayan, usa ka tanom nga makatabang sa pagpugong sa pagdahili sa yuta ug pagpanalipod sa kinaiyahan. Ang pagtanom og kawayan giila usab nga usa ka solusyon sa mga problema sa climate change, tungod kay kini dali motubo ug makatabang sa pag-absorb sa carbon dioxide.

Ang Department of Science and Technology (DOST) Mindanao, mao ang lead agency sa maong aktibidad. Kini sab ang nangulo sa bid alang sa Guinness World Record sa tinguha nga makuha ang titulo alang sa pinakadaghang mga tawo nga dungan magtanom og kawayan. Pinaagi niini mahatagan dugang importansya sa kamahinungdanon sa kawayan sa pagpreserba sa kinaiyahan.

Ang kalihokan dili lamang alang sa kadungganan, apan usa ka timaan sa komunidad nga ang pagkugi ug pagtamod sa kinaiyahan mahimong usa ka dakong lakang aron maangkon ang dugang mga oportunidad.

Writer: Nestor Mata, Jr.