Nagmalampuson ang Community Outreach Program sa North Davao Assessor's League, Inc. (NDALI) nga gipahigayon sa Women Development Center, Poblacion, New Corella, Davao del Norte, niadtong Enero 10, 2025.
Sa maong kalihokan, napulo ug usa ka biktima sa child abuse ang nakadawat sa mga regalo nga gihatag sa grupo. Nagpadayag kini og dakong kalipay ug paglaom alang sa mga bata nga nanginahanglan og suporta ug pagtagad.
Ang programa giablihan pinaagi sa mensahe ni NDALI President Leopoldo Monteroso, Jr., Municipal Assessor sa Lungsod sa San Isidro, kinsa naghatag og pagdasig sa tanang nahimo sa grupo alang sa komunidad.
“Actually, last year pa gyud ni, galing lang sa kaapiki sa panahon, way time, busy si ma’am, busy ming tanan, Christmas mind na kaayo so na-failure ang among pag-visit pero amo gyung gipaningkamotan nga makaanhi mi kay prebilihiyo man ni,” sulti ni Monteroso.
Mipaambit sa iyang bulawanong mensahe si Provincial Assessor Engr. Lily Salazar, nga midasig sa tanan nga ipadayon ang pagpakita og gugma ug tabang sa mga nanginahanglan.
“This is outreach from the North Davao Assessor’s Leage, Inc. So, naghatag mi diri sa ilang mga toiletries. Ginagmay ra ni sila pero gikan ni sa among kasing-kasing labi na sa Provincial Assessor’s Office kay in coordination man ni sa assessors from eight (8) municipalities… Ang akoang mensahe, nasulti man nako ganiha to inspire our children nga biktima niini, nga dili lang gyud nila i-stop ang ilang kinabuhi but then let’s forget the past kay past is past naman gyud na siya, but then, our goal – to achieve our dream. What your mind can conceive then believe you will achieve,” matud ni Engr. Salazar.
Si Acting Center Chief Maricel Renos, kinsa mirepresentar sa Women Development Center, mipadayag sa iyang kinasingkasing nga pasalamat alang sa grupo. Sumala niya nga ang pagbisita sa grupo adunay dakong kahulogan alang sa mga kabataan nga anaa sulod sa maong pasilidad.
“Kami malipayon kaayo sa inyong pag-anhi dinhia, Ma’am Lily thank you kaayo kauban sa imong mga kaubanan. Kami kung naay magbisita dinhi sa Women dili gyud ang staff ang pinaka-happy kung dili ang amoang mga in-house residence kay sukad man gud mabutang sila diri sa center dili na gyud sila kagawas, gawas kung case resolved na ni sila,” ingon ni Renos.
Ang maong kalihokan nagpakita sa tinuod nga diwa sa pagkahiusa ug pagtinabangay alang sa kaayohan sa komunidad. Padayon nga gilauman nga daghan pa ang matabangan sa North Davao Assessor's League, Inc. pinaagi sa ilang mapuslanong mga inisyatibo.
Writer: Nestor Mata, Jr.
