Gibida ang mga produktong lokal ug mga pagkaong Dabaonon sa Kadagayaan Festival atol sa ika-57 Araw ng Davao del Norte nga gisaulog Hulyo 1. Gipartisiparan kini sa 11 ka mga LGUs sa pagpanguna sa nagkadaiyang local tourism offices nga gidumalahan sa Provincial Tourism Office. Gi-display sa mga booth nga gipahiluna sa DavNor Coliseum, DNSTC, Mankilam ang mga produktong ginama sa mga lokal materials sama sa basket, bag, wallet, lakip na niini ang mga lamiang pagkaon.
Ang probinsya nga nailang banana capital sa nasud, nakagama og produktong red wine nga adunay musa brand. Kini usa sa mga gipasigarbong produkto gikan sa LGU Sto. Tomas, nga gimugna sa mga magtutungha sa BSAF pinaagi sa Sto. Tomas College of Agriculture, Science and Technology (STCAST). Ang uban nilang mga produkto hinimo sa mga Indigenous People.
"We are producing quality banana food products as pasalubong. For our non-food products we have 'yong mga wallets and bags made by our CIW women, yong atoang mga Correctional Institute Women, mga Persons Deprived of Liberty, who are producing this as their means of livelihood. And also, ang atoang mga MAGRO nga kababaenhan nga trained by the Agriculturist Office headed by Engr. Elmer Degorio. Aduna pud silay basket nga ginabaligya, kauban pud nato ang mga tribung Ata Manubo and Ata sa ilang mga beads products sama sa earrings," matud ni Dorina Ararao, Sto. Tomas Acting Municipal Tourism Officer.
"Out of the research sa atong mga estudyante sa BSAF through STCAST nakahimo mi’g research ug nakahimo sila’g musa wine out of our banana products," sulti ni Dr. Arvin Daquiz, representante sa Sto. Tomas College of Agriculture, Science & Technology.
Sa pakig-alayon sa mga nagkadaiyang pundok nga nagaluto sa mga lamiang kakanin sa lungsod sa Asuncion nakahalin kini og kapin P50 mil sulod lamang sa tulo ka adlaw.
"Sa three days lang niabot og P52,340. So, silang tanan nabahin gyud kay naa silay mga sales. Wala pay labot karong adlawa," ingon ni Girlie Quezon, Asuncion Tourism Officer.
"Tungod kay community-based ang among gi-tap nga mo-display dinhi, isa-isa sila sa ilang mga products. Naa silay mga pakulo,” sulti ni Aurora Alvaran, usa ka staff sa Asuncion Tourism Office.
Samtang gipasigarbo usab sa LGU Braulio E. Dujali ang ilang mga pagkaon ug mga produktong ginama sa ilang mga panggang kasimanwa.
"Lami ni siya ipares, best partner sa mangga sa Samal ug sikwate sa San Isidro. Ug coco sugar usa usab nga ikapasigarbo sa amoang local farmers sa produkto sa Braulio E. Dujali," matud ni Yvette Moral, staff sa Braulio E. Dujali Tourism Office.
Ang ubang lokalidad sama sa Siyudad sa Tagum, munisipyo sa San Isidro, IGACOS, New Corella, Carmen, ug Talaingod, aktibo usab nga nipartisipar sa pagpakita sa ilang mga nagkadaiyang produkto. Ang Tagum ni-display sa ilang lamiang humba nga nahimong kampyonato sa pakontes sa nasangpit nga dapit. Samtang, ang San Isidro, gibida ang tablea alang sa mainitong sikwate.
Ang Kadagayaan Festival, nga gipahigayon matag tuig atol sa selebrasyon sa pagkahimugso sa probinsya, nagpadayag sa kadagaya sa mga lokal nga produkto ug pagkaon sa Davao del Norte.
Writer: Maria Lorna Tripoli
