Malampuson nga gipahigayon sa Davao Provincial Rehabilitation Center (DPRC) ang National Correctional Consciousness Week gikan Oktubre 21 hangtod 28, 2024, nga nagtumong sa paghatag og inspirasyon ug suporta sa mga persons deprived of liberty (PDL).

Nagsugod ang selebrasyon pinaagi sa usa ka motorcade nga gisundan sa Santos nga Misa dayon ang programa. Gilingaw sa One DavNor Band ang mga dumuduong pinaagi sa ilang makapahugyaw nga mga kanta, samtang ang mga PDL nagpasundayag sab sa ilang talento sa pagsayaw ug pag-awit, nga nakadugang og kadasig sa okasyon.

Usa sa mga highlight mao ang ceremonial lighting of the torch, nga nagsimbolo sa paglaum ug positibo nga kaugmaon alang sa mga PDL. Gisundan kini sa mga kalihokan sama sa sack race, diin aktibong nisalmot ang mga PDL o mas nailhan sa tawag nga bakasyonista.

Gipasidunggan ni Provincial Warden Marilyn Erolon ang mga religious sectors pinaagi sa paghatag og sertipiko isip pag-ila sa ilang walay pu-as nga suporta sa rehabilitasyon sa mga PDL. Dako usab ang iyang pasalamat sa suporta sa probinsya ilabi na kang Governor Edwin I. Jubahib.

Ang tema sa National Correctional Consciousness Week 2024 mao ang "Makataong Pakikitungo, Matinong Pamumuno at Matatag na Prinsipyo Tungo sa Maunlad na Serbisyong Pampiitan."

Writer: Lorna Tripoli