Malampusong gipahigayon ang duha ka adlaw nga Regional Business Conference nga gidumala sa Department of Agriculture XI ilalom sa Philippine Rural Development Project (PRDP) sa Molave Hotel, Tagum City. Ang maong kalihokan nagsentro sa pagpasiugda sa pagpalambo sa industriya sa lubi sa rehiyon ug aktibong gisuportahan sa mga lokal nga panggamhanan, nasyonal nga ahensya, ug mga kooperatiba sa mga mag-uuma og lubi.

Gipasiugdahan sa DA-PRDP ang kalihokan sa tumong nga mapalig-on ang kolaborasyon tali sa mga sektor aron mapadako ang kita ug mapauswag ang kinabuhi sa mga mag-uuma og lubi. Ang mga partisipante gikan sa nagkalain-laing mga lokal nga panggamhanan ug nasyonal nga ahensya, lakip na ang mga lider sa mga kooperatiba sa mag-uuma, nagtinabangay aron mas mapalapad ang oportunidad alang sa mga negosyo sa lubi.

Sa maong kalihokan, mihatag og mensahe si Provincial Administrator Engr. Josie Jean Rabanoz, nga nagrepresentar kang Governor Edwin “Kuya Gov” Jubahib ug sa probinsyal nga panggamhanan sa Davao del Norte. Matud ni Rabanoz, ang PLGU andam kanunay nga mosuporta sa mga inisyatibo nga makatabang sa mga mag-uuma og lubi. Nagtuo si Rabanoz nga pinaagi sa pakigtambayayong sa DA-PRDP ug uban pang mga sektor, mas mapalambo pa ang industriya sa lubi ug mapaabot ang kalamboan ngadto sa komunidad.

“Agriculture plays a huge part in the income of the Province of Davao del Norte. As such, we have intentionally put our bestfoot forward towards attainment of our development agenda KUYA GOB NG MASA wherein Y stands for Yield Growth in Agriculture and Environmental Sustainability,” matud ni Rabanoz.

Nagbinayloay og lain-laing mga ideya ug mga praktikal nga solusyon ang mga partisipante nga makatabang sa pagpauswag sa produksyon ug merkado sa lubi. Lakip sa mga gihisgutan ang mga teknolohiya sa pagproseso sa lubi, mga pamaagi sa pagpauswag sa agrikultura, ug mga programa nga naghatag og suporta sa mga mag-uuma.

Ang kalihokan natapos nga puno sa paglaom alang sa umalabot nga kalamboan sa industriya sa lubi, diin gipasalig sa tanang mga partisipante ang padayon nga suporta ug kooperasyon alang sa kaayohan sa sektor sa lubi ug sa mga mag-uuma sa rehiyon.

Writer: Nestor Mata, Jr.