Gitigom ang mga residente ug opisyal sa mga barangay nga pirmeng apektado sa baha sa duha ka adlaw nga dayalogo nga gitumong sa pagpakusog sa kahimtang sa kaluwasan batok sa mga kalamidad sa probinsya.
Ang kalihokan, nga may tema nga“Strengthening Resilience: Disaster Prevention & Mitigation Dialogue for Flood Risk Reduction in Davao del Norte,”gipahigayon niadtong Hulyo 14-15, 2025, sa DavNor Sports and Tourism Complex sa Mankilam, Tagum City, ubos sa pagdumala sa Provincial Disaster Risk Reduction and Management Office (PDRRMO).
Gitambongan kini sa mga lumulupyo ug opisyales sa mga barangay gikan sa Distrito Uno ug Dos—mga lugar nga sagad mabahaan—aron ipadayag ang ilang kasinatian ug mga hangyo nga dugay na nilang gipaningkamutang matubag.
Gipahayag sa Office of Civil Defense (OCD) nga kinahanglan ang tukmang dokumentasyon sama sa hazard assessment report, community consultation, ug sertipikasyon nga walay pondo gikan sa LGU o Provincial Government aron ipasa ang mga proyekto sa flood control ngadto sa National Disaster Risk Reduction and Management Office (NDRRMO).
“Ang maong pondo gikan sa National Disaster Risk Reduction and Management Fund (NDRRMF), apan ang Office of the President gihapon ang mopirma para sa katapusang pag-apruba,” pasabot ni Ian Evert Cayunda sa OCD Region XI.
Gihangyo sa mga residente sa San Isidro, Kapalong, ug Tagum City ang OCD Region XI nga iprayoridad ang ilang mga proyekto ug paspasan ang pagproseso sa pag-release sa pondo aron mapadali ang rehabilitasyon sa mga nadaut nga dalan, konstruksyon sa mga dike ug culverts, ug uban pang proyekto nga makatabang sa pagpugong sa baha.
Matod ni PDRRMO Head Glenda Delideli, kinahanglan ang color coding ug mapping aron mahibal-an kung asa taman ang pagsaka sa baha. Gipaminaw usab ang mga kasinatian ug suhestiyon sa katawhan, labi na sa barangay level, aron mahatagan og klaro ug konkretong direksyon ang mga programa batok sa baha.
Gipasalig sa PDRRMO nga andam si Governor Edwin Jubahib sa pag-apod-apod og pondo gikan sa Local Disaster Risk Reduction and Management Fund (LDRRMF) ug uban pang tinubdan sa ayuda alang sa mga barangay nga grabeng nadaut sa baha.
“Nagapangita si Kuya Gov og paagi nga makakuha og dugang pondo, gikan lokal hangtod national, aron matukod ang angay nga flood control management plan,” dugang ni Delideli.
Gihangyo ang publiko nga mahimong kabahin sa solusyon pinaagi sa pag-recycle ug pagsunod sa waste segregation, ug aktibong partisipasyon sa mga programa sa kalikopan.
Samtang, usa ka paglagda sa ‘Pledge of Commitment"’ ang gihimo human sa diskusyon agi’g pagsuporta sa tinguha nga ang tanan kabahin sa solusyon sa pagsulbad sa baha.
Writer: Lorna TripoliPhotographer: Andrew John Hababag
