Gidalit sa Probinsyal nga Panggamhanan sa Davao del Norte ang Employees’ Health Forum sa kapitolyo una pa nahuman ang tuig 2024 nga gipahigayon sa DavNor Gym, DNSTC, Mankilam, Tagum City, Disyembre 20.
Ang forum, subay sa Health and Wellness Program ni Governor Edwin I. “Kuya Gov” Jubahib, nagtutok sa pagpalambo sa pisikal ug mental nga kaayohan sa mga empleyado, ilabi na taliwala sa mga stressors sa trabaho ug personal nga kinabuhi.
Si Dr. Dominic Basalo, Provincial Health Officer I, ug Nutritionist-Dietitian III May Flor Espiritu, nipresentar sa nagkalain-laing health programs ug serbisyo. Samtang, ang Provincial Human Resource and Management Office nagdumala sa diskusyon, nga nagpunting sa stress management, husto nga nutrisyon, ug mental health awareness.
Gitanyag usab ang praktikal nga mga solusyon aron masuportahan ang mga empleyado sa pagpuyo diha sa himsog nga kinabuhi. Ang kalihokan gihimo aron mapalambo ang kahibalo ug kooperasyon taliwala sa mga empleyado, nga magpabilin nga giya sa mas maayong panglawas.
Si Charlito Lezirino, usa sa mga trabahante nga nadestino sa Provincial General Services Office (PGSO), nagsulti nga ang programang panglawas dako kaayo’g tabang sama kaniya.
“Maayo man ang ilahang programa nga health and wellness kay maka-benefit pud na sa atoa mga empleyado. Unya maayo ang ilang mga program, ug makahatag pud sila’g kaayohan sa atong mga katawhan sa Davao del Norte,” sumala ni Lezirino.
Iyang gipanghinaut nga malungtaron ang programa sa gobernador uban sa pag-awhag sa mga kaubanang trabahante nga makanunayon kini sa pagpa-checkup.
“Sa mga empleyado okay na iyahang programa karon nga dapat mapa-checkup gyud ta. Pareha sa akoa nga nagpabasa ko gahapon, niresita si Dra. Parreñas ug daghang resita to. Mao nga mapadayon gyud na iyang health and wellness,” dugang niya.
Ang Health and Wellness Program gipatuman sa probinsya sa tumong nga himsug ug lig-on ang panglawas sa mga empleyado nga katambayayong ni Gov Jubahib sa pagtunol sa serbisyo sa mga Dabaonon.
Writer: Lorna Tripoli
